Այս փուլում դեռ հայտնի չէ, թե ֆինանսների նախարարության կազմում ինչ սկզբունքով են գործելու հարկային եւ մաքսային մարմինները։ Հանրապետության նախագահը հանձնարարել է կառավարությանը առաջիկա ամսվա ընթացքում ընդունել հրամանագրից բխող իրավական ակտերը։ Այդ ընթացքում էլ կճշտվի նախարարության մեջ միավորված կառույցների գործունեության սկզբունքները։
Այնուհանդերձ կարելի է ասել, որ սա դառնալու է Հայաստանի ամենախոշոր նախարարություններից մեկը, եթե ոչ առաջինը։ Միավորմամբ հարկային-մաքսային համակարգերի կարգավիճակը բարձրացվեց եւս մեկ աստիճանով։ Բազմաթիվ վերակազմավորումներից հետո վերջին տարիներին այն գործում էր կոմիտեի մակարդակով։ Այժմ հարկային մարմինները ստանում են նախարարության կարգավիճակ, որը խնդիրները լուծելու ավելի լայն հնարավորություններ է ստեղծում։
Դա նպաստավոր ազդեցություն կարող է ունենալ առաջին հերթին հարկերի հավաքման, ստվերային տնտեսության կրճատման, օլիգոպոլիաների դեմ պայքարելու առումով։ Սա խնդիր է, որ Հայաստանում մշտապես եղել է՝ բարդություններ ստեղծելով բյուջեի եկամուտների կատարման համար։ Առավել եւս դա նկատվում է այս տարվա սկզբին։
Ինչպես հայտնի է, 2014թ. նախատեսված է հավաքել լրացուցիչ շուրջ 100 մլրդ դրամի բյուջետային եկամուտ։ Առաջին եռամսյակում հաջողվել է ապահովել այդ գումարի չնչին մասը՝ ընդամենը 8,7 մլրդ դրամը։ Որքան էլ բյուջեի եռամսյակային համամասնություններով նախատեսված պլանը ամբողջությամբ կատարվել է, այնուհանդերձ դա դեռ չի նշանակում, թե ամեն ինչ հարթ է ընթանում։
Կարդացեք նաև
Նկատի ունենալով, որ հիմնական բեռը տեղափոխվել է հետագա ամիսների վրա, բյուջետային մուտքերի կատարման ծանրաբեռնվածությունն առաջիկայում անպայման զգացնել կտա։ Տնտեսական ակտիվության հետ կապված հույսերն առայժմ այնքան էլ չեն արդարանում։
Մանրամասները կարդացեք «Հայոց աշխարհի» այսօրվա համարում
