ԱԺ-կառավարություն հարցուպատասխանի ժամանակ այսօր ՀԱԿ խմբակցության քարտուղար Արամ Մանուկյանը հետաքրքրվեց, թե ինչպե՞ս է աշխատելու նոր կառավարությունը, արդյո՞ք գնահատական տալու է Տիգրան Սարգսյանին, որի կառավարությունը կապված է չորս սկանդալների հետ՝ օֆշոր, գազի պայմանագրեր, Որոտան, Սեւան, եւ զգուշացրեց, որ եթե չտա գնահատական, պատասխանատու կլինի այդ ամենի համար:
Ի պատասխան վարչապետ Հովիկ Աբրահամյանն ասաց, որ համաձայն չէ, թե Տիգրան Սարգսյանը սկանդալների հետ է առնչվում, համաձայն չէ այդ որակումներին՝ «թերություններ ունեցել է, բայց ձեր ասածների հետ համաձայն չեմ»:
Նաեւ նշեց, որ ինքը պատասխանատվություն վերցնող եւ թափանցիկ աշխատող մարդ է. «Անկեղծ ենք լինելու եւ չենք ամաչելու ասել, որ սխալներ ենք թույլ տվել»:
Ապա ասաց, որ կառավարության բոլոր անդամներին հրահանգել է շատ հարգալից լինել բոլոր պատգամավորների հետ, ասաց, որ պատրաստ է աշխատել բոլոր պատգամավորների հետ, բաց քննարկումներ անել, կարծիքները հաշվի առնել, բայց «դա պետք է լինի փոխադարձ եւ ոչ թե՝ ուլտիմատումներ լինեն»:
Կարդացեք նաև
Ու հիշեցրեց, որ ՀԱԿ-ը հայտարարել է, որ չի պատրաստվում աշխատել այս կառավարության հետ անգամ այն բանից հետո, որ ինքը քայլեր է արել: Ի պատասխան Արամ Մանուկյանն ասաց, որ իրենց խմբակցության դիրքորոշումը կառավարության հանդեպ՝ «քաղաքական գնահատական է, ձեր անձի հետ կապված չէ»:
Մելանյա ԲԱՐՍԵՂՅԱՆ
