Ազգային ժողովում այսօր մեծ ընդմիջմանը՝ 12.30-13.30 կայացավ ԱԺ պետաիրավական հարցերի մշտական հանձնաժողովի նախագահի ընտրության փակ քվեարկությունը: Առաջադրված էր միայն ՀՀԿ խմբակցության քարտուղար Հովհաննես Սահակյանի թեկնածությունը:
Ինչպես արդեն տեղեկացրել ենք ՝ քվեարկությանը մասնակցել են ՀՀԿ եւ ԲՀԿ խմբակցությունների անդամները:
Ընդմիջումից հետո ԱԺ ժամանակավոր հաշվիչ հանձնաժողովի նախագահ Սուքիաս Ավետիսյանը տեղեկացրեց, որ քվեարկությանը մասնակցել է 86 պատգամավոր: 80 հոգի կողմ է քվեարկել, 5 հոգի՝ դեմ, մեկ քվեաթերթիկ անվավեր է ճանաչվել: Այդպիսով, Հովհաննես Սահակյանը դարձավ ԱԺ պետաիրավական հարցերի հանձնաժողովի նախագահ: Հիշեցնենք, որ այդ տեղը թափուր էր մնացել այն բանից հետո, երբ հանձնաժողովի նախագահ Դավիթ Հարությունյանը տեղափոխվեց կառավարություն:
Մելանյա ԲԱՐՍԵՂՅԱՆ
