Ինչպես «Առավոտին» տեղեկացրեց «Երեւանյան հեռանկարներ» միջազգային փառատոնի PR պատասխանատու Դավիթ Գրիգորյանը, մայիսի 13-ին «Արամ Խաչատրյան» համերգասրահում հանդես կգա Բեռլինի պետական նվագախումբը՝ հանրահայտ դիրիժոր Դանիել Բարենբոյմի ղեկավարությամբ: Նշենք, որ Բարենբոյմը դարձել է Միլանի Լա Սկալա թատրոնի գլխավոր հյուր դիրիժորը՝ Ռիկարդո Մուտիի հրաժարականից հետո։ Նա արժանացել է բազմաթիվ մրցանակների եւ պարգեւների, այդ թվում՝ ֆրանսիական «Պատվո լեգեոն» շքանշանի, Գյոթեի մեդալի: Նա Իտալիայի Հանրապետության Մեծ խաչի ասպետի կոչում ունի, Մերձավոր Արեւելքում իր հաշտարարական գործունեության համար արժանացել է «Բուբեր-Ռոզենցվայգ» շքանշանի, Իսրայելի «Վոլֆ» հիմնադրամի արվեստի մրցանակի։ Բարենբոյմը յոթ անգամ «Գրեմի» է ստացել։
2012-ի հուլիսին Բարենբոյմը եւ նվագախումբն առանցքային դեր են խաղացել՝ BBC-ի համար կատարելով Բեթհովենի ինը սիմֆոնիաները, իններորդը համընկել է 2012-ին Լոնդոնի Օլիմպիական խաղերի բացմանը։ Բարենբոյմն է կրել օլիմպիական դրոշը բացման արարողության ժամանակ։
Ինչ վերաբերում է Բեռլինի պետական նվագախմբին, այն 450 տարվա ավանդույթներ ունի: Բեթհովենի բոլոր սիմֆոնիաների ձայնագրման համար նվագախումբը 2002 թվականին ստացել է «Ձայնասկավառակների գրան պրի», Վագների «Թանհոյզեր» օպերայի ձայնագրության համար՝ «Գրեմի», իսկ 2007 թ. Մալերի Իններորդ սիմֆոնիայի կենդանի կատարման համար՝ «Էքո» մրցանակ։
Գ. Հ.
«Առավոտ» օրաթերթ
