Ի՞նչն է պատճառը, որ քառյակի ներկայացուցիչներից մեկը քվեարկեց իշխանության ներկայացուցչի օգտին: Այսօր ԲՀԿ-ի՝ ԱԺ նախագահի ընտրություններին Գալուստ Սահակյանի օգտին քվեարկելու հետ կապված այս հարցին «Ժառանգություն» կուսակցության նախագահ Րաֆֆի Հովհաննիսյանը «Հայացք» ակումբում պատասխանեց. «Ես ուրիշի փոխարեն չեմ կարող մեկնաբանել ուրիշի վարքը: Ես չեմ համարում, որ սահմանադրական իշխանափոխություն նշանակում է Սարգսյանը Աբրահամյանով փոխելը կամ Աբրահամյանը՝ Սահակյանով: Դա սահմանադրական իշխանափոխություն չէ»:
Րաֆֆի Հովհաննիսյանն ասաց, որ «Ես երբեք քառյակ եզրը չեմ օգտագործել: Ողջունել եմ աննախադեպ համագործակցությունը խորհրդարանի ներսում եւ հույս ունեմ, որ այդ համագործակցությունը կխորանա: Ակնհայտ է, որ գործ ունենք չորս առանձին ուժերի հետ եւ միասնական օրակարգը բացակայում է այդ չորս ուժերի գլոբալ օրակարգից: Հաշվի առնելով, որ իմ ժամացույցն աշխատում է մի փոքր ավելի արագ, քան մյուսներինը, ես սիրով կսպասեմ մինչեւ մայիսի կեսերը, երբ կառավարության ծրագիրը կներկայացվի խորհրդարանին: Եթե դրա շուրջ չլինի միասնական ամբողջական դիրքորոշում թե խորհրդարանում, թե դրանից դուրս, այն ժամանակ ես կտամ գնահատական: Ցավալի է, որ չկա միահամուռ որոշում, դա վերջին ահազանգն է, խորհրդարանական այդ չորս ուժերի համագործակցության: Ամենաառանցքայինը լինելու է կառավարության ծրագրի շուրջ տեսակետը:
Ընդունելով, որ ամեն մեկն ունի իր մոտեցումը, մենք կսպասենք մինչեւ կառավարության ծրագրի ներկայացնելը: Այդ ուժերը խոստացել են միացյալ հրապարակ»:
Հռիփսիմե ՋԵԲԵՋՅԱՆ
