Հատված ՀՀԿ պատգամավոր ՍԱՄՎԵԼ ՆԻԿՈՅԱՆԻ հետ հարցազրույցից:
-ՀՀԿ-ում ակնկալվո՞ւմ էր, որ ԱԺ նախագահի ընտրությունը կվերածվեր մրցակցության, հանձին ընդդիմադիր պատգամավորի՝ Հրանտ Բագրատյանի ինքնաառաջադրման:
-Դա մեզ համար անակնկալ չէր, քանի որ նման դեպք նախկինում եւս եղել է: Հիշո՞ւմ եք, ԱԺ նախագահի պաշտոնում իմ ընտրության ժամանակ «Ժառանգություն» խմբակցությունը եւս ներկայացրեց իր թեկնածությունը:
Թեեւ գիտակցում էին, որ իրենց առաջադրումը որեւէ գործնական նշանակություն չի ունենալու, քանզի ԱԺ քաղաքական մեծամասնությունն իր առաջադրած թեկնածուին է սատարելու եւ քվեարկելու է նրա օգտին, հետեւաբար հաղթանակը միանշանակորեն ՀՀԿ թեկնածուինն է լինելու: Բայց ամեն դեպքում իրենք խոսք ունեին ասելու եւ օգտագործեցին այդ խոսափողը: Կարծում եմ, նույն տրամաբանությամբ այս անգամ էլ առաջնորդվեց Հրանտ Բագրատյանը:
-ՀԱԿ ներկայացուցիչը նկատեց, թե քանի որ ԱԺ հաշվիչ հանձնաժողովի բոլոր 7 անդամներն էլ ՀՀԿ խմբակցությունից են, ու հանձնաժողովը ձեւավորվել է օրենքի խախտումով, ուրեմն նորընտիր նախագահը կարող է ոչ լեգիտիմ համարվել:
Կարդացեք նաև
-Դեմ եմ նման գնահատականին: Հաշվիչ հանձնաժողովն ընդամենը մեկ գործառույթ ունի, այն է՝ իրականացնել ձայների հաշվարկ: Բոլորի համար պարզ է՝ ՕԵԿ-ի կոալիցիայից դուրս գալուց ու ընդդիմություն դառնալուց հետո, ըստ էության, ՀՀԿ-ն այդ հանձնաժողովում դառնում էր փոքրամասնություն: Այսինքն՝ եթե հանձնաժողովի անդամ մյուս քաղաքական ուժերը հանկարծ որոշեին բոյկոտել, ուրեմն ընտրություն չէր իրականացվելու, կստացվեր, որ ԱԺ փոքրամասնությունն անվերջ բոյկոտելով՝ կարող է վիժեցնել կարեւոր ընտրական գործընթացները:
Բայց նման բան չի կարող լինել, որովհետեւ հաշվիչ հանձնաժողովի գործը ոչ թե բոյկոտելն ու ընտրությունները չեղյալ հայտարարելն է, այլ, ինչպես ասացի, ձայներ հաշվելը: Հետեւաբար բնականոն աշխատանք իրականացնելու համար անհրաժեշտ էր հանձնաժողովի ձեւավորման հարցում նոր մոտեցում դրսեւորել, ինչն էլ արվեց:
Ինչ վերաբերում է ոչ իշխանական ուժերին, թող գային ու մասնակցեին հանձնաժողովի ձեւավորմանն ու իրենց ներկայացուցիչն ունենային այդ կազմում: Այնպես որ ոչ լեգիտիմության մասին խոսակցություններն ամենեւին լուրջ չեն:
Հարցազրույցն ամբողջությամբ՝ «Հայոց աշխարհ» թերթի այսօրվա համարում
