«Մենք ունենք նոր վարչապետ, մենք ունենք նոր կառավարություն, որի, բացառությամբ տնտեսական բլոկի մի մասի մնացած բոլոր նախարարները, թվում է, թե շարունակվում են մնալ իրենց պաշտոններում»,- այսօր՝ ապրիլի 29-ին՝ լրագրողների հետ հանդիպման ընթացքում, հայտարարեց քաղաքագետ Սերգեյ Մինասյանը:
Նա այդ փաստը բացատրում է նրանով, որ նախագահ Սերժ Սարգսյանը կարճաժամկետ քաղաքական ապագայում՝ առնվազն մինչեւ 2017 թվականի խորհրդարանական ընտրությունների նախընտրական քարոզարշավի սկիզբը, նպատակ ունի ավելի կայուն քաղաքական հենարան ստեղծել: Նա կարծում է, որ այդ պատճառով նպատակ էր դրված նոր վարչապետի շուրջ համախմբել որոշ քաղաքական ուժերին, սակայն դա չստացվեց:
Անդրադառնալով այն փաստին, որ Սերժ Սարգսյանը չի մասնակցելու ապրիլի 29-ին Մինսկում կայանալիք Մաքսային միության նիստին ՝ Սերգեյ Մինասյանը նշեց, որ Հայաստանը պատրաստվում է միանալ մի կառույցի, որի հիմքը դեռ գտնվում է կայացման փուլում եւ որի հիմնադիր երեք նախագահների միջեւ լուրջ խնդիրներ կան. «Քաղաքական խնդիրներն այնքան շատ են, որ ի նկատի առնելով ճանապարհային քարտեզի կատարած աշխատանքից, որեւէ այլ խնդիրներ կարող են լուծվել այս միջոցառմանը, առավել եւս, ես կարծում եմ, որ անակնկալ ե՛ւ հայտարարություններ կլինեն, ե՛ւ ինչ-որ քայլեր կլինեն՝ կապված այդ եռյակի միջեւ անձնական եւ քաղաքական խնդիրների հետ»:
Քաղաքագետ Գեղամ Նազարյանը համարում է, որ այդ հայտարարությունն անակնկալ չէր, քանի որ համարում է, որ նա չէր կարող մասնակցել եւ ստորագրել մի բան, որի 3 հիմնադիրները դեռ չեն հասկանում, թե ո՞ւր պիտի գնան. «Ամեն ինչ փոխվեց Ուկրաինական դեպքերից հետո, որովհետեւ Վլադիմիր Պուտինի հիմնական մեխը Ուկրաինայով ինչ-որ տնտեսական միություն ստեղծելն էր, եթե Ուկրաինան այնտեղ չկա, արդեն բոլորովին փոխվում է ե՛ւ իրավիճակը, ե՛ւ նպատակները, ե՛ւ մղումները, այնպես որ Հայաստանը այստեղ, եթե ունենար նորմալ իշխանություն, ընդամենը պետք է հասկանար, որ իր ռազմաքաղաքական թիվ 1 գործընկերոջ համար ամենակարեւորն այդ անհասկանալի, մեզ ոչինչ չտվող, անորոշ, մինչեւ վերջ գաղտնի պահվող Ասոցացման համաձայնագիրը չստորագրելն էր»:
Կարդացեք նաև
Ամի ՉԻՉԱԿՅԱՆ
