Ղարաբաղյան հակամարտության կարգավորմամբ զբաղվող ԵԱՀԿ-ի Մինսկի խումբը առաջին անգամ որոշել է լսել նաև հայ և ադրբեջանցի սփյուռքի տեսակետը:
Ամերիկացի համանախագահ Ջեյմս Ուորլիքը երեկ Թվիթեր սոցիալական ցանցի իր էջում տեղեկացրել է, թե սպասում է Լոս Անջելեսում՝ հայ, և Հյուսթոնում՝ ադրբեջանական համայնքների հետ հանդիպումներին: Գրառման համաձայն՝ մայիսին տեղի ունենալիք այդ հանդիպումների ընթացքում կքննարկվի Լեռնային Ղարաբաղի հարցը:
Ամերիկացի համանախագահի մայիսի 1-2ը Լոս Անջելեսում տեղի ունենալիք հանդիպումները կազմակերպում է Ամերիկայի Հայ դատի հանձնախումբը: Նախատեսված են հանդիպումներ ինչպես Հայ դատի հանձնախմբի պատասխանատուների, այնպես էլ Լոս Անջելեսի Կալիֆորնիայի համալսարանի (UCLA) հայազգի ուսանողության և Գլենդեյլի հայկական կազմակերպությունների ներկայացուցիչների հետ, «Ազատությանը» փոխանցեց Հայ դատի հանձնախմբի Արևմտյան շրջանի տնօրեն Էլեն Ասատրյանը:
Հիշեցնենք՝ այս ամսվա սկզբին ամերիկացի համանախագահըհանդիպել էր Ամերիկայի Հայ դատի հանձնախմբի նախագահ Քեն Խաչիկյանի հետ և Թվիթերում այդ մասին գրառմանը հավելել էր, որ Խաչիկյանը «ամերիկահայերի հստակ ձայնն է»:
Լուսինե Մուսայելյան
Կարդացեք նաև
Նյութի մանրամասները կարդացեք «Ազատություն» ռադիոկայանի կայքում
