Ուկրաինայի դեպքերի հետ կապված՝ ԱՄՆ-ը Ռուսաստանի նկատմամբ պատժամիջոցների նոր ցուցակ է հրապարակել: Այս անգամվա ցուցակը նախորդից տարբերվում է նրանով, որ այս մեկի մեջ ընդգրկված են նաև իրավաբանական անձիք:
«ԻՏԱՌ-ՏԱՍՍ»-ի փոխանցմամբ, Սպիտակ Տան մամուլի քարտուղար Ջեյ Կարնիի խոսքերով, նոր պատժամիջոցները վերաբերում են 7 ռուս պաշտոնյաների և 17 ռուսական ընկերությունների:
Ցուցակի մեջ են հայտնվել ՌԴ փոխվարչապետ Դմիտրի Կոզակը, Ղրիմում Ռուսաստանի նախագահի ներկայացուցիչ Օլեգ Բելավենցևը, Պետդումայի արտաքին հարաբերությունների հանձնաժողովի նախագահ Ալեքսեյ Պուշկովը, «Ռոսնեֆտ»-ի ղեկավար Իգոր Սեչինը, ՌԴ նախագահի աշխատակազմի ղեկավարի առաջին տեղակալ Վյաչեսլավ Վոլոդինը և այլք: Ընկերություններից են՝ «Վոլգա Գրուպ»-ը, «Ստրոյտրանսգազը», «ՍՄՊ Բանկ»-ը, «Տրանսօյլ»-ը:
Պատժամիջոցներով նախատեսվում է հաշիվների սառեցում և ԱՄՆ մուտք գործելու արգելք:
Կարդացեք նաև
Կարնին նշել է, որ Ռուսաստանին մեղադրում են Ժնևի համաձայնագրի կետերը չապահովելու և Ուկրաինայում իրավիճակն ավելի սրելու համար:
Պատրաստեց Հովհաննես ԻՇԽԱՆՅԱՆԸ
