Կապանի կոմբինատում՝ «Դանդի փրեշս մեթալս Կապան» ՓԲ ընկերությունում, այս տարվա ընթացքում եւս գողություն է գրանցվել: Ընկերության տնօրենի խոսքով՝ ապրիլի սկզբներին մեծ գողություն էր կատարվել ընկերությունից, բայց կատարվածի մասին իրավապահ մարմիններին չի դիմել եւ մտադիր էլ չի տեղյակ պահել:
«Գործը ոստիկանությանն ու դատախազությանը չեմ հանձնելու, ուղղակի ներքին որոշ քայլերի եմ դիմել: Գողացված այդ ապրանքը, որ պատվիրում էինք դրսից, այլեւս չենք պատվիրելու: Մենք բացահայտեցինք, որ այն գողացված է հիմնարկից եւ վաճառվում է քաղաքում` շատ ավելի էժան գներով: Մենք ներմուծում ենք 2400 դրամով, իսկ քաղաքում նույն ապրանքը վաճառվում է 400 դրամով, եւ գիտենք, որ Հայաստան ներմուծողը միայն մենք ենք: Խոսեցինք այդ ապրանքը վաճառողների հետ, իրենք էլ են ընդունում, որ չգիտեն որտեղից է եկել այդ ապրանքն իրենց մոտ»,- ասաց ընկերության գլխավոր տնօրեն Հրաչ Ջաբրայանը՝ առանց փակագծերը բացելու, թե խոսքն ինչ ապրանքի մասին է:
Նման գողություններից խուսափելու համար ընկերության ղեկավարությունը որոշել է այլեւս տվյալ ապրանքը դրսից չներմուծել, իսկ անհրաժեշտության դեպքում աշխատողն ինքն անձամբ ստիպված կլինի իր գումարով շուկայից ձեռքբերել:
Հրաչ Ջաբրայանը միեւնույն ժամանակ խոստովանեց, որ դաստիարակության հարց է, շատ քչերն են ընկերության համար բարդություններ առաջացնում, իսկ աշխատողների 90 տոկոսը նվիրված է իր աշխատանքին:
Կարդացեք նաև
Անդրադառնալով նախկինում կատարված մի շարք գողություններին՝ պարոն Ջաբրայանն ընդգծեց, որ ընկերությունից կատարված 36 հազար դոլար արժողությամբ ապրանքի գողությունից ոչ մի նորություն չկա մինչեւ օրս: «Ես անձամբ խոսել եմ ոստիկանության Սյունիքի մարզային վարչության պետի հետ, մտահոգությունս եմ հայտնել, որ այսպիսի փոքր քաղաքում այդպիսի մեծ գողություն չի բացահայտվում: Մենք էլ գիտենք, որ այս պահին այդ ապրանքների մի մասը որտեղ է, ոստիկանությունն էլ գիտի դրա մասին, եւ մենք գիտենք ինչ գործընթացի մեջ է, բայց չի բացահայտվում: Ես անձամբ զանգել եւ պահանջել եմ, որ բացահայտվի դա, հուսով ենք, որ կբացահայտվի եւ մենք մեր ապրանքը ետ կստանանք, իսկ գողերը կպատժվեն:
Ես արդեն հոգնել եմ գողությունների մասին խոսել, չեմ ուզում կենտրոնանալ դրանց վրա…», – նշեց «Դանդի փրեշս մեթալս Կապան» ՓԲԸ գլխավոր տնօրեն Հրաչ Ջաբրայանը:
Մերի ՍՈՂՈՄՈՆՅԱՆ
Հոգնել է իր գենետիկ գող ազգից:Հեռաքրքիր է:
Կարդացեք «Սյունյաց երկիր» թերթի (22.04.2014) ներքևի ուշագրա՛վ հարցազրույցը Ջաբրայան Հրաչի հետ:
https://www.syuniacyerkir.am/news_view.php?post_id=14458