Ազգային ժողովում այսօր քննարկվում է «Սեւանա լճի էկոհամակարգի վերականգնման, պահպանման, վերարտադրման եւ oգտագործման միջոցառումների տարեկան ու համալիր ծրագրերը հաuտատելու մաuին» Հայաստանի Հանրապետության օրենքում լրացումներ կատարելու մասին կառավարության հեղինակած օրենքի նախագիծը:
Այս նախագիծն ընդունելու դեպքում Սեւանի լճից տարեկան թույլատրելի 170 մլն խորանարդ մետր ջրի փոխարեն կվերցվի 240 մլն խորանարդ մետր ջուր՝ հինգ տարվա ընթացքում:
Կառավարությունը այս օրինագծի հրատապությունը եւ անհրաժեշտությունը փորձեց բացատրել ինչպես ԱԺ գյուղատնտեսական եւ բնապահպանական հանձնաժողովի նիստում, այնպես էլ այս հարցին նվիրված խորհրդարանական լսումների ժամանակ:
Ըստ այդ բացատրությունների՝ ջրի դեֆիցիտ ունենք, որին հանգել ենք տարիների ընթացքում Հայաստանի ստորգետնյա ջրերի անխնա օգտագործումից՝ հիմնականում ձկնաբուծության նպատակներով: Սակայն, եթե հիմա Սեւանից ոռոգման նպատակների համար հավելյալ ջուր չվերցնենք՝ գյուղատնտեսությանը խոշոր վնաս կհասցվի:
Կարդացեք նաև
Այսօր Ազգային ժողովի նիստի ժամանակ ԱԺ գյուղատնտեսական եւ բնապահպանական հարցերի հանձնաժողովի նախագահի տեղակալ, ԲՀԿ խմբակցության անդամ Լյովա Խաչատրյանը կրկին ասաց, որ կառավարությունը այս նախագծով անելանելի դրության մեջ է դնում խորհրդարանին: Մի կողմից անթույլատրելի է Սեւանից ջրառը մեծացնելու թույլտվություն տալը, քանի որ, չի բացառվում, որ դա կբերի բացասական բալանսի, այսինքն՝ Սեւանի մակարդակի նվազման, մյուս կողմից՝ չթույլատրելու դեպքում կրախի առաջ կկանգնի մեր գյուղատնտեսությունը:
Լյովա Խաչատրյանը կրկին հնչեցրեց նորանոր ջրամբարների հրատապ կառուցման անհրաժեշտության հարցը: Նա հիշեցրեց, որ ՍՍՀՄ ժամանակ 170 ջրամբար էր նախագծված, որոնց մի մասն արդեն սկսում էր կառուցվել, եւ այդ ջրամբարների կառուցման դեպքում Սեւանից ընդհանրապես ջրառի կարիք չէր լինի:
Նա հիշեցրեց նաեւ, որ քանիցս առաջարկել է Արփայի վրա ջրամբար դնել, եւ մեր կառավարությունը քանիցս մերժել է, ու հիմա այդ ամբարը թուրքերն են դրել եւ երբ ուզում են Արաքսից ջուր են բացթողնում, երբ չեն ուզում՝ չեն տալիս: Նա նաեւ առաջարկեց որպես հրատապ լուծում Հյուսիս-Հարավ ճանապարհի շինարարության գումարի մի մասը հատկացնել ջրամբարների կառուցմանը՝ «ո՞ւմ է պետք էդ Հյուսիս-Հարավը»:
Իր ելույթում ՀԱԿ խմբակցության անդամ Ստեփան Դեմիրճյանն էլ անդրադարձավ ձկնաբուծությանը, որը խլում է հայաստանյան ջրային պաշարի ծախսի 65-70% -ը: «Առանց աչք թարթելու թույլտվություններ են բաժանել, ո՞վ պիտի պատասխան տա դրա համար»,-վրդովված ասաց պատգամավորը՝ նկատելով, որ ձկնաբուծարանների անխնա շահագործման արդյունքում մեր ստորգետնյա ջրերի պաշարները սպառվել են: Ջրի կորուստը մեզ մոտ կազմում է 65%, եւ դա ոչ արդյունավետ կառավարման, անպատասխանատվության եւ կոռուպցիայի արդյունքում՝ նկատեց Ստեփան Դեմիրճյանը՝ շեշտելով, որ այդ ամենի համար անպայման պետք է գտնել պատասխանատուներին եւ պատժել, իսկ բնապահպանական ոլորտում քաղաքականությունը եւ պետության վերաբերմունքը բնապահպանական խնդիրների նկատմամբ պետք է կտրուկ փոխել:
Մելանյա ԲԱՐՍԵՂՅԱՆ
Տեսանյութը՝ «Ա1+»-ի
