Խորհրդարանական «հրաշալի քառյակի» նախորդ հանդիպման ժամանակ ՀՅԴ խմբակցության ղեկավար Արմեն Ռուստամյանը հայտարարեց, որ առաջիկա քառօրյայում կենսաթոշակային պարտադիր կուտակային համակարգի վերաբերյալ ԱԺ արտահերթ նիստ են հրավիրելու: Այդ նախաձեռնությունը դեռ ուժի մեջ է: Այսօր քառյակի հերթական քննարկումից հետո լրագրողներին այդ մասին ասաց ԲՀԿ խմբակցության պատգամավոր Ստեփան Մարգարյանը. «Մենք որոշել էինք այս քառօրյայի ընթացքում արտահերթ նիստ հրավիրելու ստորագրահավաք նախաձեռնել և արտահերթ նիստ հրավիրել այդ հարցով: Մեր այդ որոշումը մնում է ուժի մեջ՝ կախված կառավարության նախագծի բովանդակությունից: Կբավարարի կառավարության նախագիծն այն խնդիրները, որոնք մենք նախապես ասել ենք, մենք չենք հրավիրի, եթե չէ, մենք կհրավիրենք արտահերթ նիստ՝ մեր պատկերացրած օրակարգով»:
Հիշենենք, որ քառյակն իր այլընտրանքային նախագիծն այսօր արդեն իսկ փոխանցել է վարչապետ Հովիկ Աբրահամյանին, ով անակնկալ կերպով եկավ քառյակի քննարկմանը: Ստեփան Մարգարյանն ասաց, որ ոչ իշխանական չորս ուժերի հիմնական պահանջն այն է, որ պարտադիր բաղադրիչը հանվի նախագծից:
Հարցին, թե վարչապետ Հովիկ Աբրահամյանի այսօրվա այցելությունից պարզ չդարձա՞ն կառավարության մտադրությունները, Ստեփան Մարգարյանն ասաց, որ վարչապետի այցն իրենց համար անսպասելի էր. «Իրենք մոտավորապես ասել են իրենցը, մենք էլ մեր տեսակետն ասացինք: Արդեն վաղը կամ երկուշաբթի օրը պարզ կլինի»:
Կառավարությունը մեկ նախագիծ արդեն ներկայացրել է կուտակային համակարգի վերաբերյալ, որն այսօր քննարկվել է ԱԺ սոցիալական հարցերի մշտական հանձնաժողովում և որն անընդունելի է ոչ իշխանական ուժերի համար: «Ես ենթադրում եմ, որ որոշակի փոփոխություններ պետք է լինեն իրենց նոր բերածի մեջ: Մինչև չլինի իրենց հստակ ու գրավոր բերված նախագիծը, ես ոչինչ չեմ կարող ասել: Իր կողմից ինքը (Հովիկ Աբրահամյանը-Ն. Գ.) հավաստիացնում է, որ ամեն ինչ կանեմ, որ բավարարվեն մարդիկ և այլն, և այլն: Բայց ես չեմ ուզում որևէ բան հստակ ասել մինչև չլինի հստակություն»,- ասաց Մարգարյանը: Վարչապետի հետ քառյակում պայմանավորվել են` կառավարությունը պետք է հստակ ու վերջնական ասի, թե ինչի են իրենք պատրաստ:
Կարդացեք նաև
Ոչ իշխանական չորս ուժերի համատեղ նիստում քննարկվել է նաև կարմիր գծերի և արագաչափերի հարցը, ոչ իշխանական ուժերն այդ հարցով արտահերթ որոշման նախագիծ էին ներկայացրել ԱԺ, որը պետք է երկուշաբթի քվեարկության դրվի: Քառյակում մնում են իրենց տեսակետին` անհրաժեշտություն կա հանձնաժողով ձևավորելու:
Քառյակի նիստում քննարկված երրորդ հարցը վերաբերել է համատեղ միջոցառումների ծրագրին: Ստեփան Մարգարյանն ասաց, որ քառյակը քննարկել է հետագա գործունեությունը, որը ներառում է ինչպես համատեղ օրինագծերի մշակում հասարակական հնչեղություն ունեցող հարցերի վերաբերյալ, այնպես էլ չեն բացառվում հանդիպումներ հանրահավաքների տեսքով, դահլիճներում, նաև մարզերում: Այդ հավաքները կլինեն հանրությանը հուզող հարցերի շուրջ:
Նելլի ԳՐԻԳՈՐՅԱՆ
