Այսօր իր ասուլիսի ընթացքում, այն բանից հետո, երբ հայտարարեց, որ հրաժարվում է Ազգային անվտանգության խորհրդի քարտուղարի պաշտոնից, ՕԵԿ նախագահ Արթուր Բաղդասարյանը չբացառեց, որ կառաջադրվի 2018թ. նախագահական ընտրություններին, բայց վերապահում արեց՝ «մինչ այդ դեռ շատ ջրեր կհոսեն, դեռ վաղ է այդ մասին խոսելը»:
Ինչ վերաբերում է այն կարծիքներին, թե ՕԵԿ-ը իշխանությունների հետ պայմանավորվածությունների շրջանակում է իշխանությունից դուրս եկել՝ ինչպես 2006-ին, Արթուր Բաղդասարյանն այդ կարծիքի հեղինակներին «չարախոսներ եւ գրչակներ» է անվանում: «Ի՞նչ պայմանավորվեցինք 2006-ին, որ մեր կուսակցությունից 11 պատգամավո՞ր դուրս գա, որ մեր վրա քրեական շինծու գործե՞ր հարուցվեն…. Դա՞ ենք պայմանավորվել… Իսկ հիմա ո՞ւմ հետ ենք պայմանավորվում, մի մարդու, ով հայտարարել է, որ մեծ քաղաքականությունից դո՞ւրս է գալիս, ինչի՞ համար…»:
Մելանյա ԲԱՐՍԵՂՅԱՆ
