Ապրիլի 26-ին Հայաստանի ազգային պատկերասրահում կբացվի իտալացի անվանի նկարիչ, քանդակագործ Բրունո Բրունիի աշխատանքների ցուցահանդեսը, որը կազմակերպվում է ՀՀ նախագահի հովանու ներքո:
Այս մասին այսօր լրագրողների հետ հանդիպման ժամանակ ասաց «Անտիկյան» ցուցասրահի հիմնադիր Արմինե Անտիկյանը: Նա նաև տեղեկացրեց, որ ցուցահանդեսի կազմակերպմանն աջակցում է Հայաստանում Իտալիայի դեսպանատունը, համադրողը «Անտիկյան» ցուցասրահն է, իսկ գլխավոր հովանավորը՝ «Ռենկո» շինարարական կազմակերպությունը:
Վերջինիս ներկայացուցիչ Ջիովաննի Գասպարինին պատահական չի համարում, որ «Ռենկո»-ի համագործակցությունը Հայաստանի հետ հատկապես մշակութային ոլորտում է. «Շատ քիչ վայրեր կան աշխարհում, որոնց հանդեպ մեծ սեր եմ տածում, և դրանցից մեկը Հայաստանն է,- ասում է նա,- Հայաստանը, իհարկե, դեռևս կարիք ունի ավելի ճանաչված լինելու և արժանի է դրան: Իսկապես, մենք Հայաստանում մշակութային բարձր մակարդակ ենք տեսնում, և Եվրոպայի շատ երկրներ պարզապես կնախանձեին հայկական մշակույթին: Հայերը պետք է հպարտ լինեն, որ նման ինքնատիպ մշակույթ ունեն: Մենք այստեղ մեր մշակույթին մոտ մշակույթ ենք գտել, ինչը և´ հաճելի է, և´ շատ կարևոր տվյալ երկրում աշխատելու համար: Ինչ վերաբերում է Բրունո Բրունիի աշխատանքների ցուցադրությանը, ես համոզված եմ, որ այստեղ հիանալի ցուցահանդես կանցկացվի»:
Նշենք, որ արվեստագետը Հայաստանի ազգային պատկերասրահի որմնանկարների սրահում կներկայացնի իր ստեղծագործական բոլոր շրջաններն ընդգրկող մոտ 100 աշխատանք:
Կարդացեք նաև
«Իմ աշխատանքներն ընկալելը շատ հեշտ է: Պարզապես դիտել է պետք»,- ասում է Բրունո Բրունին:
Նկարիչը շատ ընդհանրություններ է տեսնում հայերի և իտալացիների միջև. «Ամենից առաջ մենք նման ենք իրար որպես երկու քրիստոնյա երկրներ, և, բացի այդ, հայերն ու իտալացիները մտածելակերպով են նման, ինչն արտահայտվում է նաև արվեստի մեջ: Օրինակ՝ հենց Հայաստանի ազգային պատկերասրահի երրորդ հարկում գտնվող որմնանկարները շատ ընդհանրություններ ունեն իտալական որմնանկարների հետ»:
Արվեստագետը ցավով նկատեց, որ այնքան էլ լավ չի ճանաչում Հայաստանը: «Հայաստանում գտնվելուս ընթացքում կփորձեմ հնարավորինս շատ շրջել և տեսնել ձեր երկիրը, ուզում եմ ավելի շատ գիտելիքներ ձեռք բերել Հայաստանի մասին: Ամեն դեպքում, ինչ որ տեսել եմ այստեղ, ինձ շատ է դուր եկել»,- ասաց Բ. Բրունին:
Արմինե Անտիկյանի փոխանցմամբ՝ Բրունո Բրունիի աշխատանքների ցուցադրությունը կշարունակվի մինչև հունիսի 2-ը: Իսկ այդ ընթացքում իրենք կփորձեն կազմակերպել արվեստագետի հանդիպումը արվեստի բուհերի ուսանողների հետ: «Մենք անհրաժեշտ ենք համարում այդպիսի հանդիպումները, որովհետև կարծում ենք, որ այդ երկուստեք շփումները շատ բան են տալիս ինչպես արվեստագետին, այնպես էլ նրա արվեստով հետաքրքրվողներին»,- ընդգծեց «Անտիկյան» ցուցասրահի հիմնադիրը:
Սիրանուշ ՀԱՅՐԱՊԵՏՅԱՆ
