Նիդերլանդների Ալմելո քաղաքում երեկ բացվեց Հայոց Եղեռնի զոհերին նվիրված հուշահամալիրը: Ինչպես «Առավոտին» տեղեկացրեց հոլանդաբնակ մեր հայրենակից Սերժ Կանայանը, համալիրի հեղինակն ու նախաձեռնողը հայազգի Քրիստիան Գելիջին է, որը կատարել է հոր ցանկությունը:
Հուշահամալիրը գտնվում է հայկական եկեղեցու տարածքում, կառուցված է տուֆից եւ ունի 16 խաչքար: Ցեղասպանության զոհերի ոգեկոչման եւ հիշատակի արարողությանը, ի թիվս այլոց, մասնակցել է Նիդերլանդների Թագավորությունում ՀՀ դեսպան Ձյունիկ Աղաջանյանը, նիդերլանդական խորհրդարանի պատգամավորներ, պատվիրակություն Հայաստանից, հոգեւոր դասի ներկայացուցիչներ, այդ թվում՝ Մայր Աթոռ Սուրբ Էջմիածնի դիվանապետ Տեր Արշակ եպիսկոպոս Խաչատրյանը:
Նշենք, որ շուրջ 70 000 բնակչություն ունեցող քաղաքում ապրում է 6000 հայ: Այստեղ գործում է հայկական կիրակնօրյա դպրոց:
Լուսանկարները՝ Սերժ Կանայանի
Կարդացեք նաև
«Առավոտ» օրաթերթ
