Հատված ԱԺ փոխնախագահ Էդուարդ Շարմազանովի հարցազրույցից:
– Ես հասկանում եմ, որ ընդդիմության հացը իշխանությանը քննադատելն է, բայց Հայաստանում կա՞ այդ ընդդիմությունը։ Ոչ իշխանական ուժ ու ընդդիմություն տարբեր հասկացություններ են։
– Եթե դու իշխանություն չես, ուրեմն դու ընդդիմություն ես քաղաքագիտորեն։
– ԲՀԿ-ն իրեն ընդդիմություն չի համարում՝ ընդդեմ քաղաքագիտության։
Կարդացեք նաև
– Դա իրենց խնդիրն է, յուրաքանչյուրն ունի իր օրակարգը։ Մենք մեր առաջարկն արել ենք, մենք ցույց ենք տվել հասարակությանը, որ մեր խնդիրը ոչ թե իրար ոչնչացնելն է, հայհոյելը կամ քննադատելը, այլ ժողովրդի մատից փուշ հանելը։ Մենք ասել ենք ուզում եք մասնակցել, համեցեք, եկեք խելք խելքի տանք, ունենք հակասություն, փորձենք ընդհանուր եզրեր գտնել ու հարցը լուծել։ Պատասխանները հայտնի են, մեկնաբանել չեմ ուզում իրենց ներքին խնդիրները։ Ես ուզում եմ վերահաստատել, որ ՀՀԿ-ն քաղաքական կոնստրուկտիվիզմի, քաղաքական համերաշխության և երկխոսության կողմնակից է գործով։ Մեր խոսքը գործ է. մենք դա ցույց ենք տվել։ Եթե քննադատելն ավելի գայթակղիչ է, շահեկան չէ իշխանության մաս լինել, որովհետև բազում խնդիրներ կան, որոնք արդեն դու պետք է լուծես, իրենց խնդիրն է, ես կոռեկտ չեմ համարում իրենց խնդիրների մեջ մտնել։
– Դա չի՞ վերածվում ՀՀԿ-ի մեկուսացման։ Այս ընթացքում ամենաանսպասելին ՕԵԿ-ի քայլն էր, նա էլ է հեռանում։
– Ոչ, որևէ մեկուսացման խնդիր չկա։ Ես անսպասելի չեմ համարում ՕԵԿ-ի քայլը, ՕԵԿ-ը ինքնուրույն կուսակցություն է եղել կոալիցիայում և մնում է այդպիսին։
– Այն դժգոհությունները, որ իրենք ներկայացրին իբրև խնդրահարույց, վեց տարի եղել են, ինչո՞ւ հիմա։
– Դժգոհությունները ավելի մեծ լիազորություններ ունենալու հետ են կապված։
– Վարչապե՞տ։
– Ավելի մեծ պատասխանատվություն։ Մենք հարգանքով ենք վերաբերվում ՕԵԿ-ի տեսակետին։ Քաղաքական կուսակցությունն ինքն է որոշում իր տեղն ու դերը քաղաքականության մեջ։ Եթե համամիտ չեն, քաղաքակիրթ ելքը կոալիցիայից դուրս գալը, հետո քննադատելն է։ ՕԵԿ-ի քայլը անսպասելի թվաց, որովհետև մենք քաղաքական մշակույթով չենք առաջնորդվում։ Մենք կարծում ենք եթե եղել են կոալիցիայում, մեկ տարի հետո իրավունք չունեն քննադատելու իշխանությանը։ Այդպես չէ։ Մեզ մոտ
կարծրատիպեր են իշխում։ Իշխանություն-ընդդիմությունը ընտրությունների ժամանակ է որոշվում։ Բարոյական է, թե անբարո, սկզբունքային է, թե անսկզբունք, դա այլ խնդիր է:
Զրույցը վարեց Անահիտ ԱԴԱՄՅԱՆԸ
Հարցազրույցն ամբողջությամբ կարող եք կարդալ «Իրատես de facto» թերթի այսօրվա համարում
