«Ազատություն». Հայոց ցեղասպանության զոհերի հիշատակի օրը Ֆրանսիայի նախագահ Ֆրանսուա Օլանդը Փարիզում՝ Կոմիտասի արձանի մոտ, մասնակցեց ֆրանսահայերի կազմակերպած ոգեկոչման միջոցառմանը:
Օլանդը ժամանեց ճիշտ նախատեսված ժամին և ամենից առաջ ծաղկեպսակ զետեղեց Կոմիտասի արձանի տակ:
Նախ խոսեցին Ֆրանսահայ կազմակերպությունների համակարգող խորհրդի ղեկավարները, որոնք ողջունեցին Ֆրանսիայի նախագահին, ինչից հետո խոսք վերցրեց ինքը Օլանդը:
Նա իր ելույթը սկսեց Կոմիտասից՝ ասելով, որ Կոմիտասը կրել է այն դժբախտ ճակատագիրը, որ ունեցել են այստեղ հավաքված ընտանիքների նախնիները: Այն, ինչ կրել է Կոմիտասը և մյուս հայերը Օսմանյան կայսրությունում 1915 թվականին, մի ողբերգություն է, որը չի կարելի այլ կերպ անվանել, քան իսկական, բուն բառով՝ genocide (ցեղասպանություն), ընդգծեց Ֆրանսիայի նախագահը:
Կարդացեք նաև
Օլանդը ասաց, որ Ֆրանսիան ճանաչել է Հայոց ցեղասպանությունը պաշտոնապես, և ինքը մասնակցել է այդ օրենքի ընդունման աշխատանքներին:
Ապա նա խոսեց ժխտողականության դեմ՝ ասելով, թե բոլոր այն քայլերում, որ կանեն ֆրանսահայ կազմակերպությունները, ինքը կլինի միշտ նրանց կողքին:
Ֆրանսուա Օլանդը, սակայն, չհստակեցրեց, թե երբ նորից խորհրդարանում կհայտնվի ցեղասպանության ժխտումը քրեականացնող օրինագիծը:
Ռուզաննա ԿՅՈՒՐԵՂՅԱՆ
Հրապարակումն ամբողջությամբ՝ սկզբնաղբյուր կայքում:
