Վերջերս «Գլոբալիզացիայի եւ տարածաշրջանային համագործակցություն» վերլուծական կենտրոնի ղեկավար Ստեփան Գրիգորյանը կարծիք էր հայտնել, որ Ադրբեջանը սահմաններում պահպանում է լարվածությունը, քանի որ մտավախություն ունի, որ ԼՂՀ հարցն աշխարհի կողմից կմոռացվի, քանի որ կան ավելի առաջնային խնդիրներ՝ Ուկրաինայի եւ Ռուսաստանի հետ կապված: Քաղաքագետը, նաեւ չէր բացառել, որ ԵԱՀԿ Մինսկի խմբի ազդեցությունը հնարավոր է այնքան թուլանա, որ նույնիսկ լուծարվի՝ տարածաշրջանային զարգացումների պատճառով:
Aravot.am-ը ԼՂՀ Ազգային ժողովի արտաքին հարաբերությունների հանձնաժողովի նախագահ Վահրամ Աթանեսյանից հետաքրքրվեց, արդյոք հնարավոր համարում է Մինսկի խմբի լուծարումն ու եւ Լեռնային Ղարաբաղի հարցի` միջազգային հանրության կողմից մոռացումը: «Ես այդքան էլ հոռետես չեմ: Ինչ վերաբերվում է Մինսկի խմբի լուծարմանը, ապա թո՛ղ տպավորություն չստեղծվի, թե Մինսկի խումբն աշխատում է մեզ համար, եւ եթե Մինսկի խումբը լուծարվի, դա մեզ համար ողբերգություն չպետք է լինի»:
Մեր այն հարցին, Ստեփանակերտում Ղրիմի հանրաքվեի առթիվ տեղի ունեցած տոնախմբությունը, որը Հայաստանում քննադատության արժանացավ, արդյո՞ք տեղին է համարում այդ տոնակատարությունը, ինչին ի պատասխան պարոն Աթանեսյանը հերքեց. որ Ղարաբաղում նման տոնախմբություն է տեղի ունեցել.«Ոչ մի տոնախմբություն Ղարաբաղում չի եղել, ոչ մեկը տոնախմբություն Ստեփանակերտում չի կազմակերպել, եթե անգամ այդ տպավորությունը կա, ապա սխալ տպավորություն է»:
Անդրադառնալով 1915 թվականի Հայոց ցեղասպանությանը եւ հայ-թուրքական հարաբերություններին՝ պարոն Աթանեսյանին փոխանցեցինք, որ երեկ նախկին պատգամավոր Ուֆուք Ուրասի կարծիքը, որ Հրանտ Դինքի սպանությունից հետո թուրք երիտասարդությունը սկսել է այլ կերպ մտածել. հնարավո՞ր է թուրք երիտասարդները դրական ազդեցություն ունենան հայ-թուրքական հարաբերությունների վրա, մեր այս հարցին էլ պարոն Աթանեսյանն ասաց. «Մարդու սպանվելուց հետո, ցավում են այդ մարդու համար, դա մի քիչ ցինիզմ է հիշեցնում: Պետք չէր սպանել Հրանտ Դինքին, պետք էր պահպանել որպես Թուրքիայի քաղաքացի եւ հօգուտ Թուրքիայի աշխատող լրագրողի: Սպանել մարդուն եւ ափսոսել մարդու համար՝ ցինիզմ է»:
Կարդացեք նաև
Ամի ՉԻՉԱԿՅԱՆ
