Ինչպես արդեն տեղեկացրել ենք, այսօր՝ վաղ առավոտից Ծիծեռնակաբերդի բարձունքում տեղակայված Հայոց ցեղասպանության զոհերի հուշահամալիր մարդկանց հոսքը չի դադարում: Նրանց շարքում են սփյուռքահայեր, օտարերկրացիներ, ՀՀ քաղաքական, մշակութային, հասարակական գործիչներ, քաղաքական կուսակցությունների ներկայացուցիչներ, պարզապես քաղաքացիներ:
Մարդիկ Ծիծեռնակաբերդի բարձունք են եկել անգամ իրենց նորածինների հետ: Նրանք եկել են ոգեկոչելու Հայոց ցեղասպանության զոհերի հիշատակը:
Aravot.am-ի հետ զրուցած քաղաքացիների հիմնական պահանջը Թուրքիայի կողմից Հայոց ցեղասպանության ճանաչումն ու հատուցումն է, նրանց միակ զգացողությունը վրեժխնդրությունն է:
Հիշեցնենք, որ Օսմանյան կայսրությունում Առաջին համաշխարհային պատերազմի տարիներին իրականացվել են հայ բնակչության կոտորածներ, որը անվանում են Հայոց ցեղասպանություն: Այս փաստը ճանաչել են աշխարհի 20-ից ավելի երկրներ՝ Ուրուգվայ, Ֆրանսիա, Իտալիա, Գերմանիա, Նիդերլանդներ և այլն:
Կարդացեք նաև
Մինչ Ծիծեռնակաբերդի բարձունքում վրեժխնդրության ոգին էր գերիշխում, Մարզահամերգային համալիրի մոտակայքում՝ առևտուրն էր եռում: Ծաղկավաճառների գործը ծաղկում էր, քաղաքացիներն էլ դժգոհում էին, թե այս տարի ծաղիկը թանկացել է, եթե անցյալ տարի՝ որակյալ կակաչներ կարող էին գնել 50 դրամով, ապա այս տարի՝ 100 դրամով:
Մանրամասները՝ ֆոտոշարքում
Տաթև ՀԱՐՈՒԹՅՈՒՆՅԱՆ
