«Էրդողանի հայտարարությունը այն վկայությունն է, որ ուշ թե շուտ Թուրքիան ճանաչելու է Հայոց ցեղասպանությունը»,-Aravot.am-ի հարցին՝ ինչպե՞ս կմեկնաբանի այն, որ Թուրքիայի վարչապետ Ռեջեփ Թայիփ Էրդողանն իր «ցավն է կիսել» 1915թ-ին տեղի ունեցած դեպքերի համար, Ծիծեռնակաբերդի բարձունքում այսպես պատասխանեց փոխարտգործնախարար Շավարշ Քոչարյանը:
Այնուհետև փոխարտգործնախարարը հավելեց. «Հայոց ցեղասպանության միջազգային ճանաչմանն ուղղված աշխատանքներում հետեւողականության ցուցաբերումը ցանկալի արդյունքների կբերի»:
Նույն հարցի վերաբերյալ ՀՀԿ խոսնակ, ԱԺ փոխնախագահ Էդուարդ Շարմազանովը նշեց. «Թուրք իշխանությունը պիտի զերծ մնա այն հայտարարություններից, որոնք իրականությանը չեն համապատասխանում: Պետք է Թուրքիայի իշխանությունները վաղ թե ուշ անեն այն, ինչ Գերմանիայի իշխանությունը, որ Երկրորդ աշխարհամարտից հետո ներողություն խնդրեցին հրեա ժողովրդից և ճանաչեցին Հոլոքոստը»:
Մեր հարցին, թե թուրքական կողմի նման հայտարարությունների պարագայում արդյոք ճիշտ չէ՞ր լինի, որ ՀՀ-ն հայ-թուրքական արձանագրություններից ետ վերցնի իր ստորագրությունը, պարոն Շարմազանովը պատասխանեց. «Պարոն նախագահը հանդես է եկել ուղերձով և այստեղ հստակ ուրվագծվում է դա ու նախագահը հանդես է եկել ողջամիտ ժամկետների մասին»:
Կարդացեք նաև
Մեր հարցին՝ արդյոք ՀՀ իշխանությունները բավարար քայլեր կատարո՞ւմ են Հայոց ցեղասպանության ճանաչման ու դատապարտման համար, ՀՀԿ խոսնակը պատասխանեց. «Այսօր այն օրը չէ, որ մենք քննարկենք ՀՀ իշխանությունների քայլերը: Բոլորս՝ իշխանություն, թե ընդդիմություն, ամեն ինչ պիտի անենք, որ հարյուրամյակին ընդառաջ ավելի միաբանված լինենք: Իսկ այն, որ մարդկային հասարակության թիվ մեկ խնդիրը ցեղասպանության դեմ պայքարն է, որ նոր ցեղասպանություններ չլինեն, դա փաստ է»:
Տաթև ՀԱՐՈՒԹՅՈՒՆՅԱՆ
