«Բայց, որ ավելի կարեւոր է՝ ես կողմ եմ: Կողմ եմ կենսաթոշակային բարեփոխումների ամենաարդյունավետ ու ընդունելի ճանապարհ գտնելուն ու կողմ եմ այն համատեղ իրականացնելուն»,- հայտարարել է Հովիկ Աբրահամյանը:
Կարծում ենք, ընդհանուր առմամբ, իսկապես ողջունելի են նման մոտեցումն ու արձագանքը: Ավելին՝ «կուտակայինի հարցը», ինչպես բազմիցս նշել ենք մեր հրապարակումներում, շատ ավելի վաղ պետք է նման արձագանքի արժանանար:
Զուտ ներքաղաքական հարաբերությունների, նաեւ ընդդիմադիր ուժերի հետ համագործակցելու, ընդհանուր քաղաքական միջավայրի լիցքաթափման եւ ջանքերն ավելի արդյունավետ հուն մղելու առումներով էլ գնահատելի է վարչապետի հնչեցրած մոտեցումը: Ավելին՝ Հովիկ Աբրահամյանը անձնական վիրավորանքի պահ է ներառում այս գործընթացում: Դա էլ հասկանալի է, քանզի ընդառաջ քայլերի ու առկա խնդիրը համակողմանի մեկ անգամ եւս քննարկելու պատրաստակամության պայմաններում ուղղակի անհասկանալի եւ անտրամաբանական կլինի, եթե կուտակայինի հակառակորդները մերժողական կեցվածք ընդունեն:
Ի դեպ, մինչեւ այժմ երկխոսության վերաբերյալ իշխանության, մասնավորապես նախկին վարչապետի կոչը, ըստ էության մերժվեց «Դեմ եմ»-ի կողմից։ Դե, իսկ նորանշանակ վարչապետի հետ հանդիպում-քննարկումից հրաժարվեց ՀԱԿ-ը։
Կարդացեք նաև
Միանգամայն դրական պետք է դիտել նաեւ «պարտադիր բաղադրիչի» փաստացի կասեցումը, մինչեւ ՍԴ որոշման մեջ նշված փոփոխությունների իրականացումն ու նոր օրենսդրական փաթեթի ընդունումը: Հստակությունը ամեն դեպքում նախընտրելի է, քան այն անորոշությունը, որ ծագել էր Սահմանադրական դատարանի որոշումից ու դրա տարամետ մեկնաբանություններից հետո:
Այս ամենով հանդերձ, նաեւ հարցեր են ծագում, ամենից առաջ վարչապետի հայտարարության 5-րդ դրույթի շեշտադրման վերաբերյալ: Ի՞նչ ասել է՝ մարդկանց մասնակցությունը լինի «Պարտադիր, բայց ոչ պարտադրված»: Դա ո՞րն է: Կամ պարտադիր է լինում, կամ կամավոր:
Հետեւաբար պետք է գտնել այնպիսի լուծումներ, որոնց պայմաններում մարդիկ կգերադասեն հոժար կամքով մասնակցել այդ «կուտակային համակարգին»: Իսկ եթե մի բան պարտադիր է, ապա այն արդեն որոշակի իմաստով հենց պարտադրված է:
Ու այս դեպքում հակասությունը սոսկ մտահայեցողության խնդիր կամ փիլիսոփայական պարադոքս չէ:
Տ. ՄԻՐԶՈՅԱՆ
Հոդվածն ամբողջությամբ՝ «Հայոց աշխարհ» այսօրվա համարում
