Օֆշորային սկանդալի գլխավոր դերակատար Աշոտ Սուքիասյանի Վրաստանից Հայաստան արտահանձնման որոշումը պաշտոնապես մտել է արդեն ուժի մեջ:
Այս մասին ԳԱԼԱ-ին տեղեկացնում են ՀՀ դատախազությունից: ՀՀ դատախազության աշխատակազմի հանրային կապերի վարչության պետ Շահեն Տոնոյանը ասաց, որ գործարար Աշոտ Սուքիասյանը դեռեւս Թբիլիսիում է եւ տեխնիկական խնդիր է նրան Հայաստան արտահանձնելու հարցը: Հիմա արդեն կարելի է ասել, որ Ա. Սուքիասյանը չի բողոքարկել այդ վճիռը եւ նրան կտեղափոխեն Հայաստան:
«Պաշտոնապես արդեն արտահանձնման որոշումը մտել է ուժի մեջ: Իսկ ինչ վերաբերում է ընթացակարգին, ապա այն հետևյալն է, որ արդեն Վրաստանի արդարադատության նախարարը պետք է ստորագրի կայացված որոշումը: Իսկ արդեն դրանից հետո կկազմակերպվի արտահանձնման գործընթացը»:
Մեր այն հարցին, թե կա՞ն հստակ ժամկետներ արտահանձնման գործընթացի վերաբերյալ, Շ. Տոնոյանը նշեց. «Հիմա դա թե երբ կստորագրվի, արդեն ժամանակի խնդիր է, և այս առումով հստակ որևէ բան ասել առայժմ չենք կարող: Սակայն արտահանձնման մասին վճիռը մտել է ուժի մեջ, այսինքն` նրան արտահանձնելու են Հայաստան»: Շահեն Տոնոյանն ընդգծեց նաև, որ այստեղ կարևորը օրինագիծն ու վճիռն է, որն էլ մտել է ուժի մեջ, իսկ մնացած հարցերն արդեն տեխնիկական են, այսինքն` իրավական տեսակետից ՝Աշոտ Սուքիասյանի արտահանձմանը որևէ խանգարող հանգամանք չկա:
Կարդացեք նաև
Մանրամասները կարող եք կարդալ` ԳԱԼԱ-ի կայքում
