«Հայ-թուրքական հարաբերությունների համար Հայոց ցեղասպանության հարյուրամյա տարելիցը վերջնակետ չի: Դա առիթ է Թուրքիայի համար, որպեսզի ճանաչի Ցեղասպանությունն`այդ կերպ իր քաղաքացիների համար զարգացման եւ առաջընթացի խնդիր լուծի»,- այսօր կարծիք հայտնեց Արեւմտահայոց Ազգային Համագումարի ներկայացուցիչ Կարեն Միքայելյանը`«Արեւմտահայոց Ազգային Համագումարի» եւ «Արեւմտահայոց ժառանգների Միության» կազմակերպած «Արդարության հեռանկարներ Արեւմտահայոց համար» խորագրով կլոր սեղանի ժամանակ։
Բանախոսը համոզված է, որ առանց պատմական արդարության ճանաչման Թուրքիան չի կարող համախմբել եւ լիարժեք զարգացման տանել իր հասարակությանը:
Արեւմտահայոց Ազգային Համագումարի համար անընդունելի է Թուրքիայի որդեգրած քաղաքականությունը`հայ-թուրքական հարաբերությունները պայմանավորելով հայ-ադրբեջանական հարաբերություններով, քանզի դրանք տարբեր գործընթացներ են:
Արեւմտահայոց Ազգային Համագումարի ներկայացուցիչները գտնում են, որ Հայաստանը, բացի մշակութային հարաբերությունների բարձրաձայնումից`Ցեղասպանության ճանաչման մասին խոսելիս պետք է համարձակություն ունենա եւ քննարկի նաեւ հետեւանքների վերացման հարցը, քանզի առանց հետեւանքների վերացման, որեւէ խնդիր չի կարող լուծում ունենալ:
Կարդացեք նաև
Արեւմտահայոց ժառանգների Միության ներկայացուցիչ Արագած Ախոյանն էլ նկատեց, որ խաղաղության համար պետք է քաջ ու համարձակ լինել ու կլոր սեղանների շուրջ քննարկել բոլոր կնճռոտ հարցերը:
Նելլի ԳՐԻԳՈՐՅԱՆ
