Ցեղասպանության հիշատակման ցանկացած միջոցառման ժամանակ հայերի կողքին ու հայերի հետ էր նաև վրաց նկարչուհի Նինո Պիրցխալաիշվիլին: Իսկ ամեն ինչ սկսվեց նրանից, որ Նինոն ընթերցեց Ֆրանց Վերֆելի «Մուսա լեռան քառասուն օրը» ու ազդվեց հայ ազգին բաժին ընկած ողբերգությունից: Նրան ցնցել ու հուզել էր ողբերգության անսահմանությունը, միաժամանակ հայ մարդու մաքառման պատրաստակամությունը: Դրանից հետո երկու տարվա ընթացքում նկարչուհին նկարում է 60 գրաֆիկական աշխատանք, բոլորն էլ Ֆրանց Վերֆելի վեպի թեմայով:
Նկարչուհին ցուցահանդեսներ է ունենում Թբիլիսիում, միաժամանակ գրում բանաստեղծություններ ու երազում գալ Հայաստան: «Ես հիանում եմ հայերի տոկունությամբ, ապրելու անսահման ցանկությամբ: Իմ նպատակն է գալ Հայաստան և գտնել այդ հերոս մարդկանց սերունդներին»,-դեռ 2009 թվականին իր ցուցահանդեսներից մեկին նշել էր նկարչուհին:
Ցավոք, նկարչուհու նպատակն այդպես էլ իրականություն չդարձավ: 2012 թվականի հուլիսին հիվանդության պատճառով կյանքից հեռանում է արվեստագետը: Մի քանի ամիս անց լույս է տեսնում նրա աշխատանքների հավաքածուն:
Ա. ԲԱԴԱԼՅԱՆ
Կարդացեք նաև
«Առավոտ» օրաթերթ
