«Լրագրողների պաշտպանության կոմիտե» (CPJ) ամերիկյան կազմակերպությունը դատապարտել է ադրբեջանական «Զերկալո» թերթի վերլուծաբան Ռաուֆ Միրկադիրովի կալանավորումը, որին մեղադրում են պետական դավաճանության, լրտեսության մեջ:
Միրկադիրովին կալանավորել են Բաքվում, ապրիլի 19-ին Թուրքիայից արտաքսելուց անմիջապես հետո: Նա վերջին երեք տարիները Անկարայում էր ապրում:
«Կարծես արտաքսումը բավական չէր, Ռաուֆ Միրկադիրովը մեղադրվում է լրտեսության մեջ և ազատազրկված է: Մենք Ադրբեջանի իշխանություններին կոչ ենք անում դադարեցնել կեղծ մեղադրանքներ ներկայացնելը և չխախտել խոսքի ազատության իրավունքը», – հայտնել է Եվրոպայի և Կենտրոնական Ասիայի CJP-ի ծրագրերի համակարգող Նինա Օգնիանովան, – «Ադրբեջանը արագորեն դառնում է Եվրասիայում ամենաշատ բանտարկված լրագրողներ ունեցող պետություններից մեկը»: Ըստ CJP-ի, Միրկադիրովը Ադրբեջանում անազատության մեջ գտնվող 9-րդ լրագրողն է:
Նրա փաստաբանը՝ Ֆուադ Ագաևը, հայտնել է, որ լրագրողին մեղադրում են Հայաստանի օգտին լրտեսություն կատարելու համար: Միրկադիրովը ներգրավված էր հայ-ադրբեջանական ծրագրերի մեջ և մի քանի անգամ այցելել է Հայաստան: Նրան սպառնում է 10 տարուց մինչև ցմահ ազատազրկում:
Կարդացեք նաև
Պատրաստեց Հովհաննես ԻՇԽԱՆՅԱՆԸ
