Ըստ «Ժառանգություն» խմբակցության ղեկավար Ռուբեն Հակոբյանի, վարչապետ Հովիկ Աբրահամյանն այսօր խորհրդարանական խմբակցությունների ներկայացուցիչների հետ հանդիպման ժամանակ չի խոստացել, որ կուտակային կենսաթոշակային համակարգի «պարտադիր» բաղադրիչը հանվելու է:
Պարոն Հակոբյանը եւս այսօր վարչապետի հետ հանդիպմանն է մասնակցել ու պատմեց, որ երկուստեք ցանկություն կար միասնական լուծում տալու օրենքի հետ կապված խնդիրներին, թե ինչքանով դա կաշխատի, ժամանակը ցույց կտա. «Վարչապետն ու կառավարության անդամները ներկայացրին իրենց տեսակետը , մենք էլ ներկայացրինք մեր դիրքորոշումը, առաջիկայում 4 քաղաքական ուժերով կքննարկենք մեր մոտեցումները եւ միասնական դիրքորոշմամբ հանդես կգանք»:
Մեր հարցին, վարչապետն ինչ տեսակետ ներկայացրեց, ինչ փոփոխություններ են նախատեսել, պարոն Հակոբյանն ասաց. «Առայժմ այն, ինչ արվել է, տուգանքի ու պատժաչափերի հարցն է կասեցվել, նաեւ ասացին, որ նոր փոփոխություններ են պատրաստվում օրենքի մեջ մտցնել, ինչ փոփոխություններ կլինեն, մենք կտեսնենք»:
Մեր հարցին` ի՞նչ տպավորություն ստացաք այսօրվա հանդիպումից, կա՞ր տրամադրվածություն «պարտադիր» բաղադրիչը հանելու առումով, ասաց. «Ցանկությունը՝ ցանկություն, թե ինչպես դա կարձանագրվի օրենքում, ժամանակը ցույց կտա»:
Կարդացեք նաև
Հիշեցնենք, որ վարչապետն այսօր քննարկման էր հրավիրել խորհրդարանական խմբակցությունների ներկայացուցիչներին: Հանդիպմանը չէին գնացել միայն ՀԱԿ-ից:
Արփինե ՍԻՄՈՆՅԱՆ
