Ապրիլի 19-21-ը Հայաստանի երիտասարդական հիմնադրամի և «Ոչ պետական բուհերի ուսանողական կենտրոն» ՀԿ-ի նախաձեռնությամբ ՀԵՀ Ծաղկաձորի երիտասարդական կենտրոնում տեղի ունեցավ «Հայրենիքիս կանչով» ծրագիրը: Եռօրյա այս սեմինար-քննարկմանը մասնակցեցին ՀՀ ոչ պետական բուհերի և օտարերկրյա բուհերի հայաստանյան մասնաճյուղերի 50 ուսանողներ։
Ծրագիրը ներառում էր հայրենասիրական թեմաներով դասախոսությունների շարք, որոնք զուգակցվում էին քննարկումներով: Ծրագրի շրջանակներում տեղի ունեցան նաև ֆիլմերի դիտումներ և խմբային քննարկումներ:
«Ոչ պետական բուհերի ուսանողական կենտրոն» ՀԿ-ի նախագահ Արմինե Բարսեղյանը, խոսելով նման ծրագրերի նկատմամբ երիտասարդների հետաքրքրվածության մասին, նշեց. «Իրականում երիտասարդների առաջարկով և ցանկությամբ ենք որոշել իրականացնել այս ծրագիրը: Դասախոսությունների, քննարկումների արդյունքում ևս մեկ անգամ կարող ենք փաստել՝ ունենք հրաշալի երիտասարդություն, մտահոգված հայրենիքի, պետության և բանակի խնդիրներով»:
Արմինե Բարսեղյանի փոխանցմամբ` ծրագրի նպատակն էր նպաստել ուսանողության հայրենասիրական դաստիարակությանը, նրանց մեջ սերմանել սեր դեպի ազգային տարրեր, ուստի բանախոսները դասախոսությունները կառուցել էին Հայոց բանակի, պատմական իրադարձությունների, պետության ներքին և արտաքին քաղաքականության տեղեկատվության հիման վրա:
Այն մասին, արդյոք բավարա՞ր են երիտասարդների գիտելիքները նշված հարցերի վերաբերյալ, Արմինե Բարսեղյանն այսպիսի կարծիք հայտնեց. «Միայն այն, որ 50 երիտասարդ մեկ հարկի տակ համախմբված քննարկում է իր հասարակության, պետության, բանակի ներկայիս և ապագա անելիքները, և գլխավոր դերում տեսնում է իրեն՝ կարծում եմ սա արդեն կարևորագույն արդյունք է: Նմանատիպ ծրագրերը կարևոր են, լինելու են շարունակական»:
Հայաստանի երիտասարդական հիմնադրամի հասարակայնության հետ կապերի ծառայություն
