Օրերս Տավուշի մարզի սահմանամերձ Բերդավան գյուղի միջնակարգ դպրոցի առօրյան տարբերվում էր սովորականից: Դպրոց էին այցելել Երևանի պետական համալսարանի մի խումբ դասախոսներ տարբեր ֆակուլտետներից. բանասիրական գիտությունների թեկնածուներ, ասիստենտներ Սևակ Ղազարյանը և Սուսաննա Գաբրիելյանը, ռուսաց լեզվի և գրականության դասախոսներ Կարինե Մխիթարյանը և Մարիկա Մելքումյանը, քիմիական գիտությունների թեկնածու, դոցենտ Գևորգ Սիմոնյանը, ֆիզիկամաթեմատիկական գիտությունների թեկնածու, դոցենտ Մանվել Զաքարյանը և հայ ժողովրդի պատմության դասախոս Լիանա Մամյանը:
Հյուրերին սահմանամերձ գյուղի դպրոց էր բերել գյուղի շրջանավարտների և արդեն իրենց ուսումը ԵՊՀ-ում շարունակող ուսանողների բարի համբավն ու բավականին մեծ քանակը: Դասախոսները դասեր անցկացրին 10-րդ, 11-րդ և 12-րդ դասարանցիների համար՝ աշակերտներին հետաքրքրող թեմաներով՝ «Մաթեմատիկական ինդուկցիայի մեթոդը», «Հայկական հարցը», «Հայկական ցեղասպանությունը» և այլն: Երեխաներին ամենից շատ ոգևորեց Սևակ Ղազարյանի «Նորահայտ էջեր. Պարույր Սևակի կյանքից» թեմայով դասը, որն ուղեկցվում էր հետաքրքրասեր աշակերտների հարցադրումներով: Աշակերտների բավարարված ու ուրախ հայացքներից կարելի էր եզրակացնել, որ հանդիպումն իսկապես կայացած էր եւ ծառայել էր իր բուն նպատակին:
Ինչպես նշեց Բերդավանի միջնակարգ դպրոցի տնօրեն Արևիկ Ասատրյանը, առաջին անգամը չէ, որ ԵՊՀ-ից հյուրեր են այցելում դպրոց: 2013թ. մայիսի 15-ին ԵՊՀ-ի կանոնադրության հիման վրա պայմանագիր է կնքվել ԵՊՀ-ի և Բերդավանի միջնակարգ դպրոցի միջեւ, որի արդյունքում համալսարանի դասախոսներն արդեն երկրորդ անգամ լինում են դպրոցում: Առաջին այցը եղել է 2013թ. հոկտեմբերին, որից հետո դասախոսները 10-12-րդ դասարանի մի խումբ աշակերտների հրավիրեցին ԵՊՀ, ծանոթացրին բուհի ֆակուլտետներին, ֆիզիկայի, քիմիայի և կենսաբանության ֆակուլտետներում կատարեցին մասնագիտական փորձարկումներ՝ առարկաներին խորապես ծանոթացնելու համար: Այս հանդիպումն օգնեց աշակերտներին ապագա մասնագիտություն ընտրելու գործում:
Հանդիպումները մեծ տպավորություն թողեցին եւ աշակերտների, եւ դասախոսների վրա: Վերջիններս իրենց խոսքում նշեցին, որ ուրախալի ու պարտավորեցնող է սահմանամերձ գյուղում տեսնել նման բանիմաց, խելացի ու կրթությունը բուհերում շարունակել ցանկացող աշակերտներ: Նրանք հավաստիացրին, որ այս հանդիպումները շարունակական բնույթ կկրեն: Նրանք պատրաստակամություն հայտնեցին եւ հյուրընկալվել, եւ հյուրընկալել երեխաներին: Հյուրերը, սակայն, ցավով նշեցին, որ նման խելացի աշակերտները սովորում են վերանորոգման կարիք ունեցող դպրոցում՝ հույս հայտնելով, որ մի օր այս դպրոցն էլ կհայտնվի բարերարների ուշադրության կենտրոնում:
Կարդացեք նաև
ՆՈՒՆԵ ՂԱԶԱՐՅԱՆ
«Առավոտ» օրաթերթ
