Կարո՞ղ է արդյոք Հովիկ Աբրահամյանը բարելավել բիզնես միջավայրը։ Հազիվ թե։ Սա ոչ թե պարզ թերահավատություն է, այլ՝ նման պնդումներ անելու հնարավորություն է տալիս իրավիճակի վերլուծությունը։
Նախ՝ նույն Հովիկ Աբրահամյանը (պաշտոնական փաստաթղթերով՝ նրա որդին), ՊԵԿ ղեկավար Գագիկ Խաչատրյանը, ով խոսում է բիզնեսի բեռը թեթեւացնող օրենսդրական փոփոխությունների մասին, կառավարության եւ ԱԺ մեծամասնությունը, այդ թվում նաեւ իշխանության մաս չկազմող քաղաքական հայտնի ուժերից շատերը խոշոր գործարարներ են։ Կարելի է ասել՝ հենց նրանք են կազմում հայաստանյան օլիգարխիայի սյունը։
Եվ վերջապես բիզնես բուրգի գլխին կանգնած են նախկին եւ ներկա նախագահները։ Ուրեմն՝ հազիվ թե նման իրավիճակում իշխանությունները կարողանան իրենց «հակառակորդի»՝ փոքր ու միջին բիզնեսի համար տեսանելի քայլ անել՝ հրաժարվելով իրենց տոկոսներից ու գերշահույթներից։
Ի վերջո, ժողովրդական իմաստնությունը, թե «գողն ավելի բարձր է գոռում բռնեք գողին», միշտ արդիական է, եւ ավելի քան ակնհայտ էր Տիգրան Սարգսյանի պարագայում, երբ հայտարարելով օլիգոպոլիաների դեմ պայքարի մասին, ի վերջո ինքը դարձավ օլիգարխ։
Կարդացեք նաև
Մյուս կողմից՝ եթե անգամ Հովիկ Աբրահամյանը որոշի նման կտրուկ քայլերի դիմել, չի կարող մտադրությունն իրականություն դարձնել, եւ շատ կարճ ժամանակ անց նա կհանդիպի համակարգի դիմադրությանը, եթե այդ որոշումը ընդունված չլինի հենց համակարգի կողմից, այլապես արժանանալու է իր նախորդի ճակատագրին։
Բացի այդ, նորանշանակ վարչապետը ռազմավարական ծրագրերի առումով չի կարող որեւէ էական փոփոխություններ առաջարկել, քանի որ ՀՀԿ-ի խորհրդի նիստում, ներկայացնելով Հովիկ Աբրահամյանին, Սերժ Սարգսյանը սահմանել է խաղի կանոնները. «Կառավարության աշխատանքները կազմակերպվելու են ձեռքբերված հաջողությունները ներկայացնելու եւ դրանց վրա հիմնվելով առաջ գնալու, այլ ոչ թե նախկին կառավարությանը պախարակելու ճանապարհով»։
Արման ԳԱԼՈՅԱՆ
Հոդվածն ամբողջությամբ կարող եք կարդալ «Ժողովուրդ» թերթի այսօրվա համարում
