Երեւանի բնակիչ, 1975թ. ծնված Տիգրան Պետրոսյանին մեղադրանք է առաջադրվել այն բանի համար, որ նա 2013թ. նոյեմբերի 6-ին օդափոխման համակարգեր ներկրելու նպատակով մեկնելով Վրաստան, չի կարողացել դրանք գնել եւ Թբիլիսի քաղաքում, ոմն Գիյայից, Հայաստանում իրացնելու նպատակով ձեռք է բերել 24 հատ «Այֆոն Ս 5» մոդելի բջջային հեռախոս:
Տ. Պետրոսյանը իր վարած «Նիսան» ավտոմեքենայի սրահի նստատեղի դիմացի պահոցներում եւ ետեւի երկու նստատեղի տակ թաքցնելով՝ Բագրատաշենի մաքսակետով Հայաստան է տեղափոխել ընդհանուր 9 միլիոն 570 հազար դրամ արժեքով բջջային հեռախոսներ: Սակայն մաքսային բեռնահամալիրում դրանք հայտնաբերվել են ՀՀ ազգային անվտանգության ծառայության աշխատակիցների կողմից:
Տ. Պետրոսյանին մեղադրանք է առաջադրվել ՀՀ քրեական օրենսգրքի 215 հոդվածի 1-ին մասով («Մաքսանենգություն»): Ըստ «Դատալեքս» կայքի՝ նրա նկատմամբ խափանման միջոց է ընտրվել չհեռանալու մասին ստորագրությունը:
Մինչ Տավուշի մարզի ընդհանուր իրավասության դատարանի Իջեւանի նստավայրում դատաքննությունը սկսելը, Տիգրան Պետրոսյանը միջնորդել է դատական քննությունն անցկացնել արագացված կարգով:
Կարդացեք նաև
Նա հայտարարել է, որ միջնորդությունը ներկայացրել է կամավոր, խորհրդակցել պաշտպանի հետ, գիտակցում է արագացված կարգով դատաքննություն անցկացնելու հետեւանքները, առաջադրված մեղադրանքն իրեն պարզ է, ինքը համաձայն է դրա հետ:
Ապրիլի 11-ին Տավուշի մարզի առաջին ատյանի դատարանի նախագահ Սամվել Մարդանյանը վճռել է Տ. Պետրոսյանին մեղավոր ճանաչել առաջադրված մեղադրանքում եւ նրան դատապարտել 1 միլիոն դրամ տուգանքի, դատավճիռն ուժի մեջ մտնելուց հետո մաքսանենգության ապրանք հանդիսացող 9 միլիոն 570 հազար դրամ արժեքով 24 հատ «Այֆոնը» բռնագանձել հօգուտ Հայաստանի Հանրապետության:
Նշենք,որ Տ. Պետրոսյանը չի աշխատում, նա 3-րդ խմբի հաշմանդամ է: 2008թ. փետրվարին Երեւանի Կենտրոն եւ Նորք-Մարաշ համայնքների ընդհանուր իրավասության դատարանի կողմից նա դատապարտվել է ՀՀ քրեական օրենսգրքի 205 հոդվածի 1-ին մասով («Հարկերը, տուրքերը կամ պարտադիր այլ վճարումները վճարելուց չարամտորեն խուսափելը, որը կատարվել է խոշոր չափերով»), նրա դատվածությունը մարված է:
Ոսկան ՍԱՐԳՍՅԱՆ
Դե մեր երկիրը հազիվ էլ սենց մարդկանց հետեւից ընկնի ու ցույց տա, թե գործ ա անում: Բա ոնց: Ամբողջ մաքսային ու հարկային համակարգն ա պետք նստացնել, ոչ թե սենց մարդկանց: Երկրի օրենքը որ նորմալ, տրամաբանված լինի, ոչ մի մարդ թաքուն գործ չի անի: Բայց դա հենց բռնողներին ձեռ չի տալիս: Ահ….