Հասարակական կարծիքի ուսումնասիրության «Լևադա» կենտրոնը ներկայացրել է Ռուսաստանում նախագահ Վլադիմիր Պուտինի վարկանիշի, նրա նկատմամբ ժողովրդի վստահության աստիճանի և նրա գործունեության գնահատականի վերաբերյալ մարտի վերջին անցկացրած երկու հարցումների արդյունքները: Դրանք ցույց են տալիս, որ բավական տևական անկումից հետո Վլադիմիր Պուտինի նկատմամբ դրական վերաբերմունքը անցած տարվանից անխախտ աճում է:
Պուտինի հանդեպ վստահության զգացում ունենալու մասին է հայտնել հարցվածների 71 տոկոսը: Նախորդ տարվա համեմատությամբ ավելացել է Պուտինով հիացողների թիվը՝ եթե 2013-ին միայն 2 տոկոսն էր նման պատասխան տվել, ապա այս մարտին Պուտինով հիացողներն արդեն հարցվածների 6 տոկոսն են կազմել: Դրա հետ մեկտեղ, նվազել է Պուտինի նկատմամբ ընդգծված բացասական վերաբերմունք ունեցողների թիվը․ այս տարվա հարցման մասնակիցների միայն 2 տոկոսն են իրենց վերաբերմունքը որպես հակակրանք ձևակերպել՝ նախորդ տարվա 5 տոկոսի փոխարեն:
Ամենատարածված վերաբերմունքը ռուսաստանցիների մոտ համակրանքն է Պուտինի նկատմամբ. 31 տոկոսն է այս տարի ասել, որ Պուտինին համակրում է՝ նախորդ տարվա 18 տոկոսի փոխարեն: Հարցվածներին առավել գրավում են Պուտինի փորձառությունը` 35 տոկոսն է նման կարծիք հայտնել, 32 տոկոսը նկատել է նրա եռանդն ու վճռականությունը, իսկ մոտ 20 տոկոսը շեշտել է առաջնորդի հատկությունները:
Միևնույն ժամանակ, հարցվածներին դուր չի գալիս այն հանգամանքը, որ Պուտինը կապված է մեծ փողերի և կոռումպացված պաշտոնյաների հետ․ երկու դեպքում էլ մոտ 20 տոկոսն է նման կարծիք հայտնել:
Կարդացեք նաև
«Ո՞ւմ շահերն է ներկայացնում Պուտինը» հարցին այս տարի ամենաշատը պատասխանել են, թե ուժային կառույցների, այսինքն` հատուկ ծառայությունների, բանակի և ներքին գործերի նախարարության․ նախորդ տարվա համեմատությամբ այդ պատասխանը տվողների թիվն աճել է 9 տոկոսով և կազմել է 46 տոկոս: Երկրորդ տեղում, ըստ հարցվածների, օլիգարխներն ու խոշոր գործարարներն են: Միայն 12 տոկոսն են համոզված, որ Պուտինը ներկայացնում է սովորական մարդկանց շահերը․ վերջին տասնամյակի ընթացքում սա ամենափոքր ցուցանիշն է: Միևնույն ժամանակ, պատասխանը, թե Պուտինը առանց բացառության բոլորի շահերն է ներկայացնում, այս տարի տվել է հարցվածների 14 տոկոսը՝ կրկնակի ավելի, քան նախորդ տարի:
Հոդվածն ամբողջությամբ՝ սկզբնաղբյուր կայքում
