«Հայհիդրոէներգոնախագիծ» ՓԲ ընկերության սեփականատեր Սենիկ Ջուլհակյանի հայցի քննությունը Կենտրոն եւ Նորք-Մարաշ վարչական շրջանների ընդհանուր իրավասության դատարանում նշանակվել է մայիսի 13-ին: Դատարանն այսօր ծանուցագրով տեղեկացրել է նաեւ երրորդ անձ ճանաչված «Առավոտ» ՍՊ ընկերությանը:
Սենիկ Ջուլհակյանը պատասխանողից՝ Հայաստանի քաղաքագետների միության նախագահ Հմայակ Հովհաննիսյանից պահանջում է, որ վերջինը ներողություն խնդրի իր պատիվը, արժանապատվությունը եւ գործարար համբավը վիրավորանքի ձեւով արատավորող արտահայտությունների համար, իսկ զրպարտության ձեւով արատավորող տեղեկությունները հերքի լրատվամիջոցով: Նա պահանջում է նաեւ 600 000 ՀՀ դրամի փոխհատուցում:
Դատարանին կողմը դիմել էր, որպեսզի արգելանք դրվի Հմայակ Հովհաննիսյանի գույքի վրա, սակայն դատավոր Կարինե Պետրոսյանը մերժել էր այն:
Նշենք, որ Կենտրոն եւ Նորք-Մարաշ վարչական շրջանների ընդհանուր իրավասության դատարանը «մասնագիտացել է» Հայաստանի քաղաքագետների միության նախագահ Հմայակ Հովհաննիսյանի դեմ տարատեսակ գործերը վարույթ ընդունելով:
Կարդացեք նաև
Քրեական գործը, որը հարուցվել էր այս նույն՝ երկու վիճող կողմերի միջեւ, դեռ բողոքարկվում է ՀՀ քրեական վերաքննիչ դատարանում, իսկ նախորդ քաղհայցերը տաս եւ ավելի լրատվամիջոցների դեմ, այս նույն դատարանը բավարարել է:
