«Այս գործընթացը կարող է ակտիվանալ, սակայն ես պատերազմի վտանգ չեմ տեսնում»,-այսօր «Տեսակետ» մամուլի ակումբում լրագրողների հետ հանդիպմանը հայտարարեց ադրբեջանագետ Սարգիս Ասատրյանը:
Նշենք, որ Տավուշի մարզի սահմանամերձ շրջաններում ադրբեջանական կողմից ակտիվություն է գրանցվել, կրակոցներ են հնչել:
Ադրբեջանագետն այս ակտիվությունը կապեց ԵԱՀԿ դիտորդական առաքելության՝ հայ-ադրբեջանական սահմանին մշտադիտարկման իրականացման հետ ու նշեց. «Ցանկացած նմանատիպ այցի և կարևոր իրադարձության հետ կապված ադրբեջանական կողմը գնում է նման սադրանքների և հրադադարի ռեժիմի խախտման»:
Ադրբեջանագետը նաև հավելեց. «Այդ ակտիվացումը կապված է ոչ միայն համանախագահների այցի, այլև գլոբալ աշխարհաքաղաքական փոփոխությունների հետ»:
Կարդացեք նաև
Սարգիս Ասատրյանը մտահոգություն հայտնեց իրավիճակին՝ միջազգային հանրության արձագանքի առումով ու նշեց. «Միջազգային հանրությունը համարժեք չի արձագանքում այս գործողություններին: Սա նոր խնդիրր չէ»:
Aravօt.am-ի հարցին՝ արդյոք սա ՀՀ արտաքին քաղաքականության ոլորտում տեղ գտած բացթողումների արդյունք չէ՞ նաև: Ադրբեջանագետը պատասխանեց.«Ինչ խոսք, ՀՀ քարոզչությունը և արտաքին քարոզչությունը մի փոքր ակտիվ պետք է լինեն, որ մենք զիջողի դերում չհայտնվենք: Ադրբեջանն ունի հստակ նպատակ և բոլոր ռեսուրսները մղում է այդ նպատակին հասնելու համար: Մեզ մոտ ցրված է այդ ամենը: Ունենք բազմապրոֆիլ արտաքին քաղաքականություն, ինչի արդյունքում տպավորություն է ստեղծվում, որ մենք արտաքին արենայում ավելի պասիվ ենք, քան Ադրբեջանը»:
Տաթև ՀԱՐՈՒԹՅՈՒՆՅԱՆ
