«Որքանով ես հասկանում եմ՝ քսան տարի է՝ քաղաքական ուժերը իրար հետ պայմանավորվում են: Մեկը հզորանում է, մյուսը թուլանում է»,- այսօր՝ ապրիլի 21-ին՝ լրագրողների հետ հանդիպման ընթացքում, հայտարարեց ԺԿ նախագահ Տիգրան Կարապետյանը:
Անդրադառնալով Հովիկ Աբրահամյանի վարչապետ նշանակմանը՝ Տիգրան Կարապետյանն ասաց, որ կարծում է՝ մեկը մյուսին հնարավորություն է տալիս. երկրի նախագահը մտածում է իր կառավարման երեք տարիների մասին, որ անփորձանք իշխի եւ անփորձանք հեռանա.
«Որեւէ մի լավ բան ժողովրդի համար չեմ ակնկալում, որովհետեւ ժողովուրդը կապ չունի, որովհետեւ ժողովուրդը չի արել այդ հեղափոխությունները: Հովիկ Աբրահամյանը եղել է փոխվարչապետ, հինգ տարի անընդմեջ եղել է ընտրական շտաբի ղեկավար, որը միշտ կեղծել է ընտրությունները: Ես կզգուշանայի մտածել, որ որեւէ լավ բան կանեն ժողովրդի համար»:
Պարոն Կարապետյանը նշեց, որ պետք չէ մոռանալ, որ մի քանի տարի առաջ հանրահավաքներին հավաքվում էին երեքից հինգ հարյուր հազար մարդ, եւ եթե այդ ժամանակ ոչինչ չի փոխվել, հիմա «Դեմ եմ» շարժումը ոչինչ չի կարողանա փոխել: Նա հայտարարեց, որ նույն կերպ ինքն էլ կարող է հայտարարել, որ դեմ է բանակում զինվորին մեկ անգամ լողանալու հնարավորություն տալուն:
Կարդացեք նաև
Մանրամասները՝ տեսանյութում:
Aravot.am-ի հարցին, թե ինչպե՞ս է նա վերաբերվում Հովիկ Աբրահամյանի՝ «Դեմ եմ» շարժման հետ հանդիպմանը, պարոն Կարապետյանը պատասխանեց.
«Հետո ի՞նչ: Ո՞ւր է այդ ընդառաջը: Դե ծափ տվե՛ք»:
Պարոն Կարապետյանի տեսակետից երկրում փոփոխություններ չեն կատարվում, քանի որ ընդդիմությունն էլ է իշխանության կողմից եւ քսան տարվա ընթացքում շատ ընդդիմադիրներ են եղել եւ նրանք բոլորն էլ հիմա իշխանությունների կողքին են. «Արթուր Բաղդասարյանն էլ է ասում ես ընդդիմություն եմ, ոնց որ ընդդիմությունը իրենց համար շանտաժի միջոց է: Միմյանց շանտաժի են ենթարկվում, հետո միավորվում են, հետո լեզու են գտնում»:
Տիգրան Կարապետյանը հրաժարվեց մեկնաբանել ՕԵԿ-ի այդ քայլը. «Բոլորն էլ գիտեն ի՞նչ արժեք ունի Արթուր Բաղդասարյանը: Կոալիցիա են մտնում, կոալիցիայից դուրս են գալիս, ոնց որ խաղ ու պար է»:
Ամի ՉԻՉԱԿՅԱՆ
