Գենդերային հավասարության թեման այս անգամ Երևանում մեկ տանիքի տակ էր միավորել է 30 երիտասարդների աշխարհի 12 երկրներից: Երիտասարդները ոչ ֆորմալ կրթության շրջանակներում քննարկեցին գենդերային անհավասարության, սեռերի տարբերության պատճառով առաջացող խնդիրները, փորձեցին պարզել, թե որքանո՞վ է թեման արդի իրենց երկրներում, և ի վերջո առաջարկեցին առկա խնդիրների հավանական լուծումներ:
«Գենդերային հավասարություն. Տեսությունից մինչև իրականություն» սեմինարի մասնակիցները բավականին պատրաստված, թեմային ծանոթ և դրանում հետաքրքրված երիտասարդներ էին, ովքեր իրենց երկրներում ակտիվորեն ներգրավված են հասարակական գործունեության մեջ:
Սեմինարի ընթացքում, որը կազմակերպվել էր Երիտասարդական Շունչ (Youth Breath) ՀԿ-ի կողմից` Հայ Առաջադեմ Երիտասարդություն ՀԿ հետ համագործակցությամբ, մասնակիցներին մեծ հնարավորություն էր ընձեռվել քննարկել թեմայի տարբեր ասպեկտները համախոհների հետ: Քանի որ թեման շատ արդի է մեր օրերում, և տարբեր երկրներում այն շոշափելի է ամենատարբեր մակարդակներով, սեմինարի մասնակիցները մեծ հնարավորություն ունեցան քննարկելու դրա տարբեր դրսևորումները իրենց հասարակություններում, կարծիքներ փոխանակեցին գենդերային անհավասարության պատճառների վերաբերյալ, և, վերջապես, ծանոթացան հյուրընկալող երկրի` Հայաստանի իրավիճակին:
Կարդացեք նաև
Սեմինարի շրջանակներում մասնակիցները նաև այցելեցին Pink Armenia և Հասարակություն Առանց Բռնության հասարակական կազմակերպություններ, որտեղ ավելի մանրամասն և խոր տեղեկատվություն ստացան գենդերային խտրականության, ընտանեկան բռնության և այլ խնդրահարույց թեմաների շուրջ:
Ակտիվ քննարկումներ տեղի ունեցան Հայաստանում «գենդեր» բառի սխալ ընկալման պատճառով առկա լարվածության և անհանդուրժողականության վերաբերյալ:
Հասարակություն Առանց Բռնության ՀԿ այցելության շնորհիվ ավելի պարզ դարձան ընտանեկան բռնության տարբեր պատճառները, խնդրի առկայության և դրանք թաքցնելու դրդապատճառները և հատկապես կանանց նկատմամբ բռնության դրսևորումները:
Սեմինարի շրջանակներում թեմային խորը ծանոթանալուց բացի՝ մասնակիցները հնարավորություն ունեցան նաև ծանոթանալ հայկական մշակույթին, ավանդույթներին և հարուստ պատմությանը` այցելելով Գառնու տաճար և Գեղարդավանք:
Սեմինարի հիմնական նպատակն էր բազմակողմանի տեղեկատվություն տրամադրել մասնակիցներին թեմայի շուրջ ոչ ֆորմալ կրթության մեթոդներով և հասարակական ակտիվ կյանք վարող երիտասարդներին կրթել հանուն առողջ, անվտանգ և խտրականություններից զերծ հասարակության ձևավորման:
Հայ Առաջադեմ Երիտասարդություն ՀԿ մամուլի հաղորդագրություն
