«Ցավոք սրտի, երկրում մի իրավիճակ է ստեղծվել, որ խոստումները հավատ չեն ներշնչում, միայն՝ կոնկրետ քայլերը»,- այսօր՝ ապրիլի 19-ին՝ լրագրողների հետ հանդիպման ընթացքում, անդրադառնալով երեկ «Դեմ եմ» շարժման բողոքի ակցիայի ընթացքում նորանշանակ վարչապետ Հովիկ Աբրահամյանի հետ հանդիպմանը, հայտարարեց շարժման նախաձեռնող խմբի անդամ Արսեն Մանուկյանը:
Նա խոստովանեց, որ որպես քաղաքացի, իր համար ոչինչ չի փոխվել եւ կհասկանա, որ ինչ-որ բան է փոխվել միայն, երբ մաշկի վրա կզգա այդ փոփոխությունը: Նա հավելեց, որ շարժման անդամները չեն նստելու եւ սպասելու խոստումների կատարմանը, այլ՝ շարունակելու են պայքարել: Արսեն Մանուկյանի խոսքերով՝ դեռ վաղ է խոսել վստահությունների մասին. «Եթե այս կառավարությունը մտածում է, որ ինչ-որ մի բան պետք է փոխվի դա պետք է արվի կոնկրետ քայլերով, ոչ թե՝ խոստումներով»:
Այն հարցին, թե արդյո՞ք «Դեմ եմ» նախաձեռնության անդամները վստահում են հանրապետության նախագահին Դավիթ Մանուկյանը նշեց, որ վստահության հարց չէ, իրենք պահանջում են, որ նախագահի ինստիտուտը պատշաճ գործի.
«Այդ պաշտոնը վարողը պետք է խելամիտ լինի եւ որոշի, թե ինչքանո՞վ է նորմալ հանրությանը ցույց տալ, որ նախագահի ինստիտուտը պատշաճ չի գործում: Իր ենթակաները տրորում են այն սահմանադրությունը, որի վրա ինքը երդվել է»:
Կարդացեք նաև
Անդրադառնալով շարժման հետագա քայլերին՝ Դավիթ Մանուկյանը հայտարարեց, որ շարժման իրավաբանները քննարկում են դիմում ներկայացնել դատախազություն՝ պետական միջոցների անհարկի վատման հետ կապված:
Ամի ՉԻՉԱԿՅԱՆ
