Ապրիլի 18-ին «Ելակետ» մամուլի ակումբի հյուրերն էին հասարակական գործիչ, բնապահպան Կարինե Դանիելյանը և «Հայոց թանգարան» հուշարձանների պահպանության նախաձեռնության կազմակերպիչներ Աղվան Ասոյանը և Գոռ Ալեքսանյանը: Հիշեցնենք, որ ապրիլի 18-ը համարվում է հուշարձանների և պատմական վայրերի միջազգային օր:
Մամլո ասուլիսի ժամանակ հյուրերն անդրադարձան այնպիսի հարցերի, ինչպիսիք են հուշարձանների ներկայիս վիճակը, հուշարձանների շրջակա միջավայրի աղտոտվածությունը: Կարինե Դանիելյանը իր խոսքի մեջ նշեց, որ շատ հաճախ հուշարձանները քանդում են և փոխարենը կառուցում բիզնես կենտրոններ:
Նա մեծ ուրախությամբ ասաց, որ ապրիլի 16-ին քաղաքապետարանում նոր պեղումների ցուցահանդես էր, որի ժամանակ պատմեցին այդ պեղումների պատմությունը. Շենգավիթի շրջանում գտնվող՝ Արգավանդ և Շիրակի փողոց, Արտաշատի խճուղի և Արշակունյաց պողոտա ճանապարհը միացնող տարածքում կարող էին լինել հետաքրքիր գտածոներ և այստեղ դադարեցվեց բանկի շինարարությունը և նշանակվեցին պեղումներ:
Այն մասերը, որտեղ այժմ անհարմար էր կատարել պեղումներ, նրանք ճանապարհը կառուցեցին վերևից , իսկ մնացած տարածքում պեղումները արվեցին և գտածոները հանվեցին:
Կարդացեք նաև
Գոռ Ալեքսանյանը նշեց, որ պատրաստվում են բացել նոր կայքէջ, որը կոչվելու է Hayoctangaran.am, իսկ այժմ իրենց կարելի է գտնել Ֆեյսբուքում՝ գրելով Հայոց Թանգարան:
Գոռ Ալեքսանյանը հավելեց, որ կա ցանկություն համագործակցելու Սամվել Կարապետյանի հետ՝ շեշտը դնելով Հայաստանի Հանրապետության և Լեռնային Ղարաբաղի Հանրապետության տարածքում առկա հուշարձանների լուսաբանման և խնդիրների լուծման վրա:
Սիրարփի ԶՈՐԻԿՅԱՆ
