Մի խումբ բնապահպաններ դիմել են նորանշանակ վարչապետ Հովիկ Աբրահամյանին`հորդորելով հետ կանչել ներկայումս ԱԺ-ում գտնվող Սեւանա լճին առնչվող երկու օրենքների նախագծերը:
«Տիգրան Սարգսյանը գնալուց առաջ հանրությանը «նվեր» մատուցեց`ստորագրելով Սեւանա լճի մասին երկու շատ վտանգավոր որոշում` մեկը` Սեւանից լրացուցիչ 70 միլիոն խորանարդ մետր ավելի ջուր բացթողնելու, մյուսը` ձկնաբուծության համալիր զարգացման վերաբերյալ: Երկու դեպքում էլ Սեւանա լիճը կանգնած է վտանգի առաջ»,-այսօր «Էկոլուր» տեղեկատվական հ/կ-ում ասաց կազմակերպության նախագահ Ինգա Զառաֆյանը:
Երեկվանից սկսած` Սեւանա լճին առնչվող այդ երկու որոշումների դեմ բնապահպանական կազմակերպությունները ստորագրահավաք են կազմակերպել, որին արդեն միացել է 800 քաղաքացի: Գեղարքունիքի մարզի բնակիչներն էլ ապրիլի 25-ին Սեւանում ակցիա կանցկացնեն ի պաշտպանություն Սեւանի:
«Բոլորը զբաղված են քաղաքական հարցերով եւ Սեւանի խնդիրները անտեսվում են»,-նկատեց տիկին Զառաֆյանը, մինչդեռ նրա համոզմամբ, Սեւանը մեր երկրի ունեցած միակ ազգային հարստությունն է, որի վերաբերյալ ցանկացած որոշում պետք է կայացնել փորձագիտական ուսումնասիրություններից հետո միայն: Սակայն Ինգա Զառաֆյանը վստահեցնում է, որ նշյալ երկու որոշումներն էլ «նեղ անձնական շահերը սպասարկելու» համար են կայացվել` Սեւան-Հրազդան կասկադի էլեկտրաէներգիայի արտադրությունն ավելացնելու եւ օլիգարխներին, բարձրաստիճան պաշտոնյաներին պատկանող ափամերձ օբյեկտները, ջրի մակարդակի բարձրացումից չտուժելու համար:
Կարդացեք նաև
«Տարածքային զարգացման եւ հետազոտությունների կենտրոն» հ/կ ներկայացուցիչ Սաթենիկ Բադեյանի խոսքերով էլ. «Մարդիկ անընդհատ լսում են, թե Սեւանն ինչ կարեւոր, ռազմավարական նշանակություն ունի մեր երկրի համար, բայց չեն պատկերացնում: Խնդիրն այն է, որ Սեւանից բացի, ուրիշ հարստություն մենք չունենք, հանքերի պաշարները շուտով սպառվելու են, եւ Սեւանն, իր քաղցրահամ խմելու ջրով մեծ հարստություն է: Լեռնային սառնորակ աղբյուրների հիմքը Սեւանի ջուրն է, եթե այն չորացնում ենք, զրկվում ենք այդ աղբյուրներից էլ»:
Բնապահպանի մեկնաբանությունների շարունակությունը` տեսանյութում
Սաթենիկ Բադեյանը նաեւ հիշեցրեց, թե մութ ու ցուրտ տարիներին, ինչպիսի մեծ օգուտ է տվել լիճն իր ձկան պաշարներով եւ որպես էներգիայի աղբյուր. «Մենք դեռեւս դուրս չենք եկել այդ պատերազմական իրավիճակից: Ի՞նչ ենք անելու, եթե այսօր Սեւանի պաշարների հետ այդկերպ վերաբերվենք ու ջրի մակարդակը իջեցնենք, մանավանդ որ, այդ տարիների կորուստները դեռ չենք վերականգնել:
«Էկոլոգիական հասարակական դաշինք»-ի անդամ, բնապահպան Սիլվա Ադամյանն էլ ասաց, որ այդ հարցերով արդեն մի քանի նամակ են ուղարկել ՀՀ նախագահին, բայց այդպես էլ անարձագանք է մնացել: Սեւանի շուրջ մտահոգությունները իշխանություններին լսելի դարձնելու համար բնապահպանները եկող շաբաթ Ազգային ժողովի դիմաց բողոքի ակցիա կանցկացնեն` պահանջելով առանց լուրջ փորձագիտական եզրակացությունների Սեւանից ջուր բաց չթողնել: Ըստ նրանց, Սեւանի ավազանի բնակչությունը նույնպես վրդովված է այդ նախագծերով:
Բնապահպանների ներկայացմամբ, Սեւան-Հրազդան ջրատարը վթարային վիճակում է, ինչի պատճառով փոխադրվող ջրի մոտ 60 տոկոս կորուստ է լինում, եւ ըստ նրանց, փոխարենն այդ ջրատարը վերանորոգեն եւ այդ կորուստները խնայեն, մեկ այլ բնակավայրի ջրի հարցը լուծելու համար Սեւանից ավելի ջուր են բացթողնում: Ըստ նրանց, Արարատյան դաշտավայրի արտեզյան ջրերի խնդիր իրականում չկա եւ այդ ամենն ընդամենը ջրային ռեսուրսների վատ կառավարման արդյունք է:
Լուսինե ԲՈՒԴԱՂՅԱՆ
