ՀՀ վաստակավոր արտիստ, Ալ. Սպենդիարյանի անվան օպերայի և բալետի ազգային ակադեմիական թատրոնի մեներգիչ, բարիտոն Գեւորգ Հակոբյանն այսօր «Ուրբաթ» ակումբում խոսեց իր հաջողություններից: 2014թ. մարտ- ապրիլ ամիսներին նա Իսպանիայի Վալենսիա քաղաքի օպերային թատրոնում Վերդիի «Սիմոն Բոկանեգրա» օպերայում Պաոլո Ալբիանիի դերերգով հանդես է եկել Պլասիդո Դոմինգոյի հետ: Նա հատուկ շեշտեց, որ Պլասիդո Դոմինգոն արդեն մի քանի տարի է՝ հանդես է գալիս որպես բարիտոն, հավելեց, որ Սիմոն Բոկանեգրայի դերը հենց բարիտոնի դեր է: Պատմում է, որ այս անգամ առաջարկել են Պաոլո Ալբիանիի դերերգով հանդես գալ, նաեւ իբրեւ փոխարինող՝ Սիմոն Բոկանեգրա երգել: Հայ բարիտոնը նշեց, որ համաձայնել է հանդես գալ Պաոլո Ալբիանիի դերերգով: «Մաեստրոն վատառողջ էր, խնդրեց իր փոխարեն երգել Սիմոն Բոկանեգրայի դերը: Ասացի, որ չգիտեմ, ասաց՝ շատ շուտ սովորիր, այդ դերը հենց քեզ համար է: Ես մեկ շաբաթում ծայրից ծայր այդ դերերգը նոտաներով պատրաստեցի: Դոմինգոն ասաց, որ պետք է երգեմ: Ասացի՝ մաեստրո, եթե վատառողջ եք, թող փոխարինողը երգի, մաեստրոն էլ պատասխանեց, որ եթե դու երգես, այդպես ե՛ւ ես երջանիկ կլինեմ, ե՛ւ հանդիսատեսը»,-պատմեց Գեւորգ Հակոբյանը: Նա հավելեց, որ Դոմինգոյի հետ ծանոթացել է գերմանացի դիրիժոր եւ կոմպոզիտոր Լորին Մաազելի միջոցով՝ 2010-ին:
«Միշտ շատ եմ սիրել ու գնահատել Դոմինգոյի արվեստը, միշտ երազում էի մոտենալ եւ հարմար առիթով ձեռքը սեղմել»,- նշում է Գեւորգ Հակոբյանը՝ մանրամասնելով, թե ինչպես է դա պատահել:
Մանրամասները՝ տեսանյութում:
Aravot.am-ը հետաքրքրվեց՝ ինչ կարծիքի է օպերային թատրոնի վերջին զարգացումների եւ մասնավորապես տնօրենի նշանակման առիթով: Հիշեցնենք , որ Ալ. Սպենդիարյանի անվան օպերայի և բալետի ազգային ակադեմիական թատրոնի տնօրեն է նշանակվել արաբագետ Անդրանիկ Արզումանյանը:
Կարդացեք նաև
«Երբ Գեղամ Գրիգորյանը հրաժարվեց օպերային թատրոնի գեղարվեստական ղեկավարի պաշտոնը վարել ,այդ տեղը թափուր մնաց մինչեւ 2014 թվականը, իսկ դա նշանակում է, որ չկար այն մարդը, որը պետք է զբաղեցներ այդ պաշտոնը: Գուցե պետք էր մի ուժ, որը չունի ընկերներ եւ ծանոթներ օպերային թատրոնում: Մանավանդ Հայաստանը ախպերության եւ ծանոթների երկիր է: Ես զրուցել եմ նոր տնօրենի հետ, շատ լավ, առաքինի մարդու տպավորություն թողեց: Ըստ իս, դա ցանկացած գործի նախապայմանն է: Անկեղծ եմ ասում, իրեն չեմ ճանաչել, նույնիսկ անունը չգիտեի: Ինքը օպերայում չունի ծանոթներ, ախպերներ եւ անգամ մորքուրի տղա: Ուրեմն ինչո՞ւ ոչ, թող ղեկավարի: Ի դեպ, երբ նա հանդիպեց մեներգիչների հետ, ասացինք, որ թատրոնին անհրաժեշտ է գեղարվեստական ղեկավար: Անձամբ ես, միայն Գեղամ Գրիգորյանին եմ տեսնում որպես գեղարվեստական ղեկավար: Աշխարհում չկա որեւէ թատրոն, որը չունենա գեղարվեստական ղեկավար, որովհետեւ օպերան ադմինիստրատիվ աշխատանքների կենտրոն չէ, այն մշակութային օջախ է»,-ասաց ճանաչված բարիտոնը:
Ասուլիսի ժամանակ անդրադարձ եղավ նաեւ նոր մոտեցումներով օպերային ներկայացումներ բեմադրելուն: «Մենք պահպանողական ժողովուրդ ենք, օրինակ, ջինսերով օպերային ներկայացում անելը Հայաստանում լավ չի դիտվի»,-նշեց Գեւորգ Հակոբյանը:
Գոհար ՀԱԿՈԲՅԱՆ
