«Հայաստանը յուրօրինակ հարթակ կարող է դառնալ աշխարհի երկու բեւեռների միջեւ, քանի որ Արեւելյան գործընկերության երկրներից միակն է, որտեղ քաղաքական կայունություն կա: Մնացյալ երկրները կամ ՌԴ-ի, կամ եվրոպական բեւեռի հետ խնդիրներ ունեն»,- այսօր կարծիք հայտնեց «Ինտեգրացիա եւ զարգացում» հասարակական կազմակերպության նախագահ Արամ Սաֆարյանը`«Գլոբալիզացիա եւ տարածաշրջանային համագործակցություն» վերլուծական կենտրոնի եւ Հայաստանում Ղազախստանի դեսպանատան կազմակերպած «Հայաստանի եւ Ղազախստանի համագործակցությունը`Եվրասիական ինտեգրացիայի հարցում» քննարկման ժամանակ:
Արամ Սաֆարյանը կիսում է այն համոզմունքը, որ 1-1,5 տարի հետ կսկսվի ՌԴ-ի եւ ԵՄ-ի մերձեցման նոր փուլ. դա են փաստում նաեւ որոշակի վերլուծությունները, եւ, ըստ նրա, այստեղ է, որ Հայաստանը կարող է լուրջ դերակատարում ստանձնել:
Իսկ Հայաստանի եւ Ղազախստանի համագործակցության հնարավորություններն ըստ նրա բազում են նաեւ ՄՄ-ի շրջանակներում: Բայց Հայաստանին եւ Ղազախստանին, բանախոսի համոզմամբ մոտեցնում են քաղաքական եւ տնտեսական սուվերենության պահպանումն այդ միության շրջանակներում:
Արամ Սաֆարյանը ներկայացրեց նաեւ տարեսկզբին, այլ կազմակերպությունների հետ համատեղ անցկացրած հետազոտության արդյունքները, որի համաձայն, Հայաստանի`ՄՄ-ին անդամակցելու տնտեսական էֆեկտը 4,5 տոկոս էր գնահատվել:
Կարդացեք նաև
Նա վկայակոչեց նաեւ մեկ այլ հետազոտության արդյունքներ, համաձայն որոնց, Հայաստանի բնակչության 67 կողմ էր արտահայտվել ՄՄ-ին անդամակցությանը
«Գլոբալիզացիա եւ տարածաշրջանային համագործակցություն» վերլուծական կենտրոնի նախագահ Ստեփան Գրիգորյանն էլ կարեւոր համարեց այն, որ մենք պետք է սովորենք հաշվել այն բացասական ազդակները, որոնք սպասվում են Հայաստանին` ՄՄ-ին անդամակցելիս. «Պետք է կարողանանք հարցեր առաջադրել եւ քննարկել դրանք»: Պարոն Սաֆարյանը գտնում է, որ նաեւ այս առումով Հայաստանը Ղազախստանի փորձից դրական արդյունքներ կարող է քաղել:
Նելլի ԳՐԻԳՈՐՅԱՆ
