ՍԴՀԿ ատենապետ «Սոցիալ-դեմոկրատ հնչակյան» կուսակցության ատենապետ Նարեկ Գալստյանի համոզմամբ, ՕԵԿ-ը կոալիցիայից դուրս գալուց հետո սկսելու է քննադատել նոր կառավարությանը, իսկ «հրաշալի քառյակը»՝ ոչ:
«ՕԵԿ-ի դուրս գալն իշխող կոալիցիայից ինչ-որ չափով ձեռնտու էր նաև ՀՀԿ-ին, «հրաշալի քառյակը» չի քննադատելու Հովիկ Աբրահամյանի կառավարությանն այնպես, ինչպես Տիգրան Սարգսյանին էր քննադատում, և ՕԵԿ-ը սկսելու է ուժեղ քննադատել նոր կառավարությանը և մատնանշել բացթողումները, որովհետև նոր ձևավորվող կառավարությունը լուրջ օպոնենտներ չի ունենալու»,- այսօր «Հայելի» ակումբում ասաց պարոն Գալստյանը:
Նրա խոսքով, ՕԵԿ-ը փորձեց լրացնել այդ բացը, իսկ ՀԱԿ-ն ու ԲՀԿ-ն նույնպես նախկին քննադատություններն այսօր չեն հնչեցնելու նոր կառավարության հասցեին՝ ելնելով զուտ անձնավորված գործոնից. «Քառյակն ուներ հստակ խնդիր, հիմա խնդիրը լուծված է»,- ասաց նա՝ նկատի ունենալով նոր վարչապետի նշանակումը:
Հետո կրկնեց իր ավելի վաղ հայտնած տեսակետը, թե անձերի փոփոխությունը չի կարող երկրում հանգեցնել բացառիկ դրական փոփոխությունների. «Եթե չի փոխվում իշխանության գործողությունների տրամաբանությունը, երկրում դրական փոփոխություններ չեն լինի»:
Կարդացեք նաև
Նոր վարչապետի ու նոր կառավարության գործունեության մասին Նարեկ Գալստյանը չի շտապում դատել. «Եթե երկրում լինեն համակարգային փոփոխություններ, ինչի վրա մենք խիստ կասկածում ենք, դրական փոփոխություններ կլինեն: Իսկ եթե շարունակվի հովանավորվել օլիգարխիկ համակարգը, խնդիրներն էլ ավելի են խորանալու»:
Արփինե ՍԻՄՈՆՅԱՆ
