Այսօր «Հենարան» մամուլի ակումբում «Գլոբալիզացիայի եւ տարածաշրջանային համագործակցության» վերլուծական կենտրոնի նախագահ Ստեփան Գրիգորյանը չբացառեց, որ տարածաշրջանային զարգացումների պատճառով ԵԱՀԿ ՄԻնսկի խմբի ազդեցություն այնքան թուլանա, որ խումբը քանդվի`տարածաշրջանային զարգացումների պատճառով: «Նման վտանգ կա»,- ասաց քաղաքագետը:
Aravot.am-ի հարցին` եթե ստացվի այնպիսի իրավիճակ, որ Մինսկի խումբը պաշտոնապես դադարեցնի իր գործունեությունը` ի՞նչ իրավիճակ կստեղծվի, կգնա՞ Ադրբեջանը ռազմական գործողությունների, Ստեփան Գրիգորյանը պատասխանեց, որ եւ Հայաստանին, եւ Ադրբեջանին, եւ Ղարաբաղին ձեռնտու է, որ Մինսկի խումբը լինի: «Ցանկացած կոնֆլիկտում, երբ կա լուծման գլխավոր ձեւաչափը` դա միշտ դրական է: Կողմերը հույսեր են կապում բանակցությունների հետ, զերծ են մնում պատերազմելուց: Այդ գլխավոր բանաձեւը միշտ էլ կողմերի համար զսպիչ մեխանիզմ է»,- ասաց բանախոսը: Բայց եթե այդ ինստիտուտի դերը թուլանա, Ստեփան Գրիգորյանն ակնհայտ է համարում այն, որ ամեն ինչ կարող է լինել եւ ոչ միայն Ադրբեջանի կողմից:
«ՌԴ-ի վերջին շրջանի քաղաքականությունը, գիտեք, շատ կոշտ է: ՌԴ-ն բաց ասում է, որ նախկին ԽՍՀՄ տարածքն իր ազդեցության գոտի է եւ եթե Մինսկի խումբը չլինի, որտեղ բացի ՌԴ-ից նաեւ ԱՄՆ-ն ու Ֆրանսիան են՝ պարզ է, որ ամեն ինչ կարող է լինել: ՌԴ-ն էլ կարող է կտրուկ քայլերի գնալ: Մինսկի խմբի թուլացումը կամ քանդումը կբերի նրան, որ կվերականգնվի ՌԴ-ի մենաշնորհ այս կոնֆլիկտում: Ես համոզված չեմ, որ դա բխում է Հայաստանի, Ադրբեջանի ու ԼՂՀ-ի շահերից»,- ասաց Ստեփան Գրիգորյանը:
Որքան էլ կողմերի միջեւ անվստահությունը մեծ է, քաղաքագետը կարծում է, որ երկկողմ հանդիպումները պետք է լինեն: Ավելի լավ է անպտուղ հանդիպումներ, քան վտանգավոր լռություն: Նրա կազմակերպությունն էլ պաշտոնական դիմումներ է հղել խնդրով մտահոգ միջազգային տարբեր կառույցների, որպեսզի գոնե դիպուկահարների հարցը լուծվի, ինչի մասին քանիցս հայտարարություններ են ընդունվել հենց Մինսկի խմբի կողմից: Այդ հարցի լուծումն, ըստ նրա, քայլ կլինի նաեւ ուղղված վստահության հարցի լուծմանը:
Կարդացեք նաև
Փոխվստահության երկրորդ առիթը, ըստ բանախոսի, կարող է լինել Սարսանգի ջրամբարի համատեղ շահագործման բանակցությունները: Նախադեպը կա` Վրաստանը եւ Աբխազիան Ինգուրի գետի դեպքում նման համաձայնության եկան եւ դա քաղաքականության հետ որեւէ կապ չուներ: Նման քայլերն այսօր քաղաքագետն ավելի կարեւորում, քան հարցերը լուծելու փորձերը`հիմքի բացակայության պայմաններում: «Դուք տեսե՞լ եք լուծում, երբ պատերազմը շարունակվում է»,- տարակուսեց բանախոսը:
Այլ մանրամասները` տեսանյութում
Նելլի ԳՐԻԳՈՐՅԱՆ
