Այսօր «Հայաստանի էլեկտրական ցանցեր» ՀԷՑ ընկերությունը, նորմատիվ մի քանի իրավական ակտերի խախտման եւ ֆինանսական անկարգապահության համար տուգանվել է 5 միլիոն դրամով: Որքան էլ ՀԷՑ-ը Հանրային ծառայությունները կարգավորող հանձնաժողովին ներկայացրել է հիմնավորումներ, թե որոշ խախտումներ տեղի են ունեցել ընկերության ունեցած ֆինանսական խնդիրների հետեւանքով, միեւնույն է՝ հանձնաժողովը կիրառել է տուգանքը:
Aravot.am-ի հարցին, թե պատրաստվո՞ւմ եք բողոքարկել հանձնաժողովի որոշումը, հատկապես, որ ՀԷՑ-ի ֆինանսների գծով տնօրեն Վլադիմիր Սազոնովը նշել է, որ 5 միլիոն դրամ տուգանքն էլ ավելի կբարդացնի ընկերության ֆինանսական վիճակը, «Հայաստանի էլեկտրական ցանցեր» ընկերության մամուլի քարտուղար Նատալիա Սարջանյանն ասաց, որ այս պահին, բողոքարկման մասին որոշում չկա: Նրա խոսքերով՝ «Մենք մեր բոլոր հիմնավորումներն այդ հարցի հետ կապված ներկայացրել ենք որոշման նախագծում, բայց հանձնաժողովը գտել է, որ, այնուամենայնիվ, դա խախտում է եւ որոշում է ընդունել տուգանելու մասին»:
Լուսինե ԲՈՒԴԱՂՅԱՆ
