Համահայկական ծնողական կոմիտեի նախագահ Արման Բոշյանն այսօր լրագրողներին պատմեց, որ ապրիլի 3-ին կառավարությունը մերժել է մի ծրագիր, որով ներկայացված էր գենդերային միջոցառումների ցանկը:
Պարոն Բոշյանն այսօր «Ազդակ» ակումբում ասաց, որ իրենց առաջարկությամբ կառավարությունն ընդունել է նմանատիպ մի նախագիծ՝ կանանց եւ տղամարդկանց իրավահավասարության մասին տարբեր ծրագրերի, միջոցառումների ու իրավական ակտերի ցանկ. «Օրենքը փոփոխության ընթացքում է»:
Նա նաեւ անդրադարձավ դպրոցական դասագրքերում գենդերային գաղափարախոսության քարոզչության փորձերին եւ ասաց. «Եթե հանկարծ նոր կառավարությունը փորձի դպրոցական համակարգում մտցնել գենդերային գաղափարախոսություն՝ համահայկական բոյկոտ կհայտարարվի նման դասընթացներին»:
Ըստ պրն Բոշյանի, կառավարությունը մերժել է նաեւ դպրոցական համակարգում «գենդեր» եզրույթը դասագրքերում ընդգրկելու նախաձեռնությունը:
Կարդացեք նաև
Ըստ նրա, իրենք վերջերս Լեզվի պետական տեսչությունից ստացել են թիվ 275 փաստաթուղթը, համաձայն որի ՝գենդեր կարելի է համարել սեռափոխված վարք:
Պարոն Բոշյանը նաեւ պատմեց, որ նախկին վարչապետ Տիգրան Սարգսյանն էլ իրենց հարցմանը գրավոր պատասխանել է՝ հավաստիացնելով, որ Հայաստանը չունի որեւէ միջազգային պարտավորություն՝ գենդեր եզրույթը Հայաստանում օգտագործելու համար:
Նա պատմեց, որ աղմկահարույց թիվ 57 օրենքը՝ ոչ պաշտոնական անունը գենդերային օրենքը Ղրղըզստանի համապատասխան օրենքից է թարգմանվել տարիներ առաջ, երբ սոցապ նախարարը Հրանուշ Հակոբյանն էր ու դրա վրա ծախսվել է երեք միլիոն 500.000 դրամ:
Արփինե ՍԻՄՈՆՅԱՆ
