«Ես ՕԵԿ-ին չեմ տեսնում ուրիշ ոչ մի տեղ, բացի իշխանությունից»,-Aravot.am-ի դիտարկմանը, թե ՕԵԿ-ից չեն հերքում, որ կուսակցությունը դուրս է գալու կոալիցիայից, այսպես պատասխանեց քաղտեխնոլոգ Կարեն Քոչարյանը:
Հիշեցնենք, որ ՕԵԿ խմբակցության պատգամավոր Հովհաննես Մարգարյանը, ըստ էության չէր հերքել այն, որ ՕԵԿ-ը դուրս կգա կոալիցիայից և հորդորել սպասել մինչև քաղխորհրդի նիստը կայանա:
Կարեն Քոչարյանը չի պատկերացնում, թե ինչպես ՕԵԿ-ը կարող է համագործակցել ընդդիմադիր դաշտի խաղացողների հետ: Այս առիթով նա ասաց. «Ո՞նց եք պատկերացնում, որ ՕԵԿ-ը գնա ընդդիմություն, ո՞ւմ հետ պիտի համագործակցի: ՀԱԿ-ի՞` բացառվում է, «Ժառանգության»` բացառվում է, ԲՀԿ-ի` բացառվում է: Ո՞ւմ հետ, Դաշնակցությա՞ն` չեմ կարծում»:
Հարցին` իսկ ՀՅԴ-ն արդյոք կոալիցիա կմտնի՞, պարոն Քոչարյանը խուսափեց հստակ պատասխանել ու նշեց, թե «չենք կարող ասել»:
Կարդացեք նաև
ՕԵԿ-ի քայլերը քաղտեխնոլոգը «քաղաքական բազարի քայլեր է» որակում ու մանրամասնում. «Բազար` քաղաքական քվոտաների համար: Չեմ կարծում, թե քվոտաներ կստանան, քանի որ նույն բազարը սկսեցին անել վարչապետի պաշտոնի շուրջ, մեռան գրելով, թե Արթուր Բաղդասարյանն ամենալավ թեկնածուն է, բայց ստացան այն, ինչ ստացան: Նույնը լինելու է քվոտաների հետ կապված»:
Տաթև ՀԱՐՈՒԹՅՈՒՆՅԱՆ
