Տնտեսական իրավիճակն այնպիսին է, որ, իսկապես, համարձակություն է պետք այդ պաշտոնը ստանձնելու համար: Ակնհայտ է, որ վերջին շրջանում երկրի տնտեսությունը որոշակի արգելակման մեջ է, աճի տեմպը գրեթե աննշան, ավելին՝ առանձին ճյուղերում նկատելի է նաեւ անկում, որն արձանագրում է հենց պաշտոնական վիճակագրությունը:
Զուգահեռաբար, սոցիալական վիճակը մնում է շարունակաբար ծանր, անգամ՝ լարված, երկրում յուրաքանչյուր երրորդը գտնվում է աղքատության նիշին մոտ կացության մեջ: Նման պայմաններում, հասկանալի է, ցանկացած վրիպման կամ ձախողման համար առաջին մեղադրանքները հենց վարչապետին են ուղղվում:
Ըստ այդմ, առաջնահերթ անհրաժեշտություններն են տնտեսական աշխուժացումը, ներդրումների ներգրավումը, աշխատատեղերի ստեղծումը, առանցքային ոլորտներում կայուն իրավիճակի ապահովումն ու աճի նախադրյալների ապահովումը:
Ընդհանուր խնդիրներից բացի, որոնցից ամեն մեկն առանձին բավական է գլխացավեր ունենալու համար, կան նաեւ կոնկրետ պրոբլեմներ, որոնք եւս հրատապ լուծում են պահանջում: Այդ շարքից էլ կարելի է նշել Հովիկ Աբրահամյանի հարազատ Արարատի ու հարեւան Արմավիրի մարզերին անմիջականորեն վերաբերվող խորքային ջրային պաշարների պրոբլեմը, որը շաղկապված է ինչպես հողագործության, այնպես էլ ձկնաբուծության հետ եւ, ըստ այդմ, առնչվում է տասնյակ, եթե ոչ հարյուր հազարավոր մարդկանց: Կա ցրտահարությունից լուրջ վնասներ կրած ֆերմերների եւ գյուղատնտեսության հարցը: Արտագաղթի խնդիրը, երրորդը, չորրորդը…
Կարդացեք նաև
Ինչ վերաբերում է կոնկրետ Հովիկ Աբրահամյանին, ապա նա, իհարկե, հարուստ փորձ է կուտակել այս տասնամյակներում՝ անցնելով տեղական ինքնակառավարման, տարածքային կառավարման, նախարարական օղակներով:
Բայց նրա փորձը, առնվազն տարածքային կառավարման նախարար եղած շրջանում գործունեությունը, իրականացվել է ընդհանուր բարենպաստ եւ տնտեսական աշխուժության ու երկնիշ աճի պայմաններում: Հետևաբար` հետաքրքիր է, թե որքանով օգտակար կլինի այդ փորձը առավել լարված եւ անբարենպաստ պայմաններում:
Ցանկացած պարագայում, տվյալ դեպքում խոսքը մի պաշտոնյայի մասին է, որը ծանոթ է երկրի տնտեսությանն ու տնտեսական վիճակին, ենթակառուցվածքներին ու դրանց կացությանը, կոպիտ ասած՝ գիտի, թե ինչը որտեղ է դրված:
Մ. ՍԱՀԱԿՅԱՆ
Հոդվածն ամբողջությամբ՝ «Հայոց աշխարհ» թերթի այսօրվա համարում
