Արդեն երկու օր է հասարակական-քաղաքական մի շարք գործիչներ, նույնիսկ տնտեսագետներ, խուսափում են ԱԺ նախկին նախագահ Հովիկ Աբրահամյանի վարչապետ նշանակվելու փաստի առիթով որեւէ մեկնաբանություն անել: Չեն ցանկանում խոսել նույնիսկ, մինչ այս ակտիվ մեկնաբանություններով հանդես եկող քաղաքական գործիչները: Հովիկ Աբրահամյան վարչապետից ոչ լավն են ասում, ոչ վատը` պարզապես չեն ցանկանում որեւէ կարծիք հայտնել:
«Չեմ ուզում ոչ մի կարծիք հայտնել»,-Aravot.am-ի հարցին ի պատասխան, ասաց Կենտրոնական բանկի նախկին նախագահ, տնտեսագետ Բագրատ Ասատրյանը: Երեկվանից մեր հեռախոսազանգերին չի պատասխանում նաեւ ՀԱԿ անդամ Լյուդմիլա Սարգսյանը:
Նախկին վարչապետ, Հանրային խորհրդի նախագահ Վազգեն Մանուկյանը Aravot.am-ի լրագրողի հարցին, թե որպես նախկին վարչապետ, ինչպես է գնահատում նոր վարչապետ Հովիկ Աբրահամյանի նշանակումը, ասել է` «Չեմ ուզում խոսել, կես տարի հետո, նոր կասեմ»:
Երեկ, Aravot.am-ի հետ զրույցում նոր վարչապետի նշանակման լուրը ձեռնպահ մնաց մեկնաբանելուց նաեւ նախկին սոցապ փոխնախարար, «Ժառանգության» նախկին անդամ Կարինե Հակոբյանը:
Կարդացեք նաև
Հովիկ Աբրահամյանի մասին որեւէ մեկնաբանություն չարեց նաեւ նախկին վարչապետ Հրանտ Բագրատյանը: Aravot.am-ի լրագրողի հարցին ի պատասխան պարոն Բագրատյանն ասել է` երբ որ ծրագիր կներկայացնի` կասեմ:
Լուսինե ԲՈՒԴԱՂՅԱՆ
