Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանում շարունակվեց «Արաբկիր» բժշկական կենտրոնի վերակենդանացման բաժանմունքի բժիշկներ Զարինե Այվազյանի եւ Լիլիթ Վարդանյանի դեմ հարուցված քրեական գործով դատական նիստը:
Բժիշկները մեղադրվում են ոչ պատշաճ մասնագիտական օգնություն ցույց տալու համար, ինչի հետեւանքով բուժկենտրոնում մահացել է երկու տարեկան Լիա Միսակյանը:
Նրա հայրը դատարան էր եկել առանց իր ներկայացուցչի` իրավապաշտպան Արթուր Սաքունցի, եւ չնայած խնդրեց նիստը հետաձգել, քանի որ առանց ներկայացուցչի է, սակայն դատարանը` դատավոր Լեւոն Ավետիսյանը նիստը շարունակեց: Հաշվի առնվեց այն հանգամանքը, որ նախորդ նիստից հետո իրավապաշտպան ներկայացուցիչն ասել է իր բացակայության մասին:
Դատարան էին ներկայացել հինգ վկաներ:
Կարդացեք նաև
Վկաներից յուրաքանչյուրը` քիթ-կոկորդ-ականջի բժիշկ, վերակենդանացման բաժնի հերթապահ բժիշկը, վիրաբույժները եւ նաեւ բուժքույրը պնդեցին, որ զննել են երեխային, նշանակումներ են արել:
Երկու վիրաբույժների հետ կապված՝ երեխայի հայրը ասաց, որ չի տեսել նրանց, չնայած վկաներն ասացին, որ հորը տեսել են, անգամ զրուցել:
Մանկական վիրաբույժ Գեւորգ Համբարձումյանը զննել էր երեխային, շոշափել նրա որովայնը, եւ ասաց, որ վիրաբուժական առումով գանգատ չի եղել: Իսկ հարցին, թե ինչի՞ համար էր հոգնա նշանակել, բժիշկն ասաց, որ փքվածությունն իջեցնելու նպատակով:
Նա ստորագրել էր այն նույն բաց նամակի տակ, որտեղ ըստ տուժողի իրավահաջորդի՝ գնահատականներ կան դատավարության որոշակի գործողությունների մասին:
Բժիշկն ասաց, որ ինքն իր կարծիքն է հայտնել, քանի որ խոսք է գնացել բժիշկներին պատասխանատվության ենթարկելու մասին:
Հաջորդ մանկական բժիշկն էլ ասաց, թե երեխային կերակրել են, եւ նա հանգիստ է տեսել նրան:
Տուժողի հայրը ասաց. «Երբ երեխայիս տարել եմ , որեւէ բժիշկ չկար»:
Բուժքույր Անի Մինասյանը ասաց, որ իրենք սկսում են գործել բժշկի նշանակումներից հետո: Մեղադրող Դավիթ Կարապետյանի հարցին էլ, թե հնարավո՞ր է բժիշկը որեւէ նշանակում անի, իսկ բուժքույրը անհապաղ չկատարի, բուժքույրը բացառեց:
Կաթիլայինը միացնելուց այդ մասին նշումներ արվում են, բայց ըստ վկայի, այն հանելուց որեւէ նշում չի արվում, պարզապես այդ մասին բանավոր տեղեկացվում է: Այս վկան էլ ասաց, որ երբ երեխան միջանցքում փսխել է, շոկոլադի գույն է եղել զանգվածը, եւ լսել է, որ հայրը շոկոլադ է տվել:
Նա իր ցուցմունքի սկզբում ասաց, թե հունվարի երկուսին երեխան հաց է կերել, ապա չպնդեց, հետո էլ ասաց, թե նման բան չի ասել:
Սա այն դեպքում, երբ երեխայի հայրն ասում էր, որ երեխան ջերմում էր, կոկորդի ցավերի պատճառով դստերը ջուր են կաթիլներով տվել:
Այն, որ երեխան նշագեղձերի հետ կապված խնդիր է ունեցել, հաստատեց նաեւ կոկորդի, ականջի բժիշկը`Հասմիկ Գեւորգյանը:
Բժիշկներն ակնարկում էին վիրուսային ծագման հիվանդության մասին, որը կարող էր հասցնել կայծակնային մահվան: Բժիշկները ցուցմունք տալուց հետո հեռանում էին, իսկ տուժողի ներկայացուցչին այնպես թվաց, թե վկաները հաղորդակցվում են դատական նիստերի դահլիճից դուրս` միջանցքում միմյանց հետ: Դատավորը կարգադրիչի միջոցով փոխանցեց, նրանք ովքեր չեն շտապում մնան դահլիճում, իսկ թե գնալու են` գնան: Մինչդեռ, նման խնդրի առաջ չկանգնելու համար անհրաժեշտ է, որ դատարաններում բացվեն վկաների համար «նախատեսված» սենյակների դռները:
Ռուզան ՄԻՆԱՍՅԱՆ
