Aravot.am-ը տեղեկացրել էր, որ այսօր խորհրդարանում տեղի ունեցած միջազգային խորհրդարանական լսումներին` «Ազգային խորհրդարանի դերը մարդու իրավունքների պաշտպանության եւ խթանման գործընթացում», թեմայով, որը կազմակերպել էր Հայաստանում ԵՄ խորհրդատվական խումբը, ներկա էին միայն երկու պատգամավոր` Մարգարիտ Եսայանը եւ Ալեքսանդր Արզումանյանը: Ի պաշտոնե ներկա էր նաեւ ՀՀ ԱԺ համապատասխան հանձնաժողովի նախագահ Էլինար Վարդանյանը:
Նյութում նկատել էինք, որ ԱԺ Մարդու իրավունքների պաշտպանության տասնմեկ հոգանոց հանձնաժողովից, փաստորեն, որեւէ այլ պատգամավորի չեն հետաքրքրել այս լսումները ու նկատել, որ հավանաբար, գլխադասային հանձնաժողովի նախագահը պետք է ապահովեր պատգամավորների ներկայությունը, գոնե իր տասնմեկ հոգիանոց հանձնաժողովի:
Քիչ առաջ Aravot.am-ի հետ զրույցում ԱԺ Մարդու իրավունքների պաշտպանության հանձնաժողովի նախագահ Էլինար Վարդանյանը պարզաբանեց, որ Հայաստանում ԵՄ խորհրդատվական խմբի կազմակերպած սեմինարին հրավիրված են եղել բոլոր պատգամավորները: Իսկ ներկա գտնվել-չգտնվելը`յուրաքանչյուրի որոշելիքն էր, ու որ իր ղեկավարած հանձնաժողովը որեւէ պարտավորություն չուներ սեմինարին պատգամավորների ներկայություն ապահովելու:
Նելլի ԳՐԻԳՈՐՅԱՆ
