Ինչպես արդեն տեղեկացրել էինք ԵԽԽՎ-ում շրջանառության մեջ է դրված Ուկրաինայում տեղի ունեցած իրադարձությունների կապակցությամբ Ռուսաստանի վարած քաղաքականությունը դատապարտող բանաձև:
Փաստաթղթի հեղինակներն են Մեյլիս Ռեփսն ու Մարիետա դե Փուրբիքս Լունդինը: Նրանք զեկույցը պատրաստելու համար Ուկրաինա են մեկնել շուրջ 15 անգամ: Հեղինակները զեկույցում մտահոգություն են հայտնում Մայդանում կատարվածի վերաբերյալ, որի արդյունքում զոհվեցին 100 ցուցարարներ և 17 ոստիկաններ: Դիտարկելով Ռուսաստանի ռազմական ճնշումն Ուկրաինայի ժողովրդի վրա՝ որպես ժողովրդավարական ինստիտուտների սպառնալիք՝ պատվիրակները դատապարտում են Ռուսաստանի քաղաքականությունը: Բանաձևում նշվում է, որ կասկած չկա Ուկրաինայում ձևավորված նոր կառավարության լեգիտիմության հարցում և որ հաջորդ խորհրդարանական ընտրությունները պետք է անցկացվեն նոր ընտրական օրենսգրքի համաձայն:
Փաստաթղթում մտահոգություն է հայտնվում Ուկրաինայում էթնիկ փոքրամասնությունների իրավունքների խախտման, մասնավորապես Ղրիմի թաթարների իրավունքների վերաբերյալ: Մասնավորապես ՌԴ-ի կողմից Ղրիմի անեքսիայից հետո նրանք զրկվել են անգամ իրենց տներից: Բանաձևում Ղրիմի հանրաքվեն համարվում է «հակասահմանադրական», ինչպես նաև մտահոգություն է հայտնվում այն առումով, որ ռուսական զորքերը չեն հեռանում Ուկրաինայի սահմաններից: Ըստ բանաձևի՝ Ռուսաստանի ռազմական ագրեսիան Ուկրաինայի վրա անընդունելի է:
Բուռն քննարկումներից հետո ԵԽԽՎ-ում ընդունվեց Ռուսաստանի վարած քաղաքականությունը դատապարտող այս բանաձևը:
Կարդացեք նաև
Տաթև ՀԱՐՈՒԹՅՈՒՆՅԱՆ
